Shkroi: Fatbardh Dema
Përmes një postimi në median sociale Telegram pretendohet se personi që u arrestua sot (15 maj) nën dyshimet për krime lufte në komunën e Zveçanit, është ish-pjesëtar i Policisë së Kosovës (PK).
Ky pretendim u publikua nga kanali në gjuhën serbe në Telegram “БУНКЕР” (BUNKER).
E vërteta?
Pas verifikimit të fakteve nga hibrid.info, u vërtetua se ky pretendim është i rremë. Personi i arrestuar nuk është ish-pjesëtar i PK-së.
Hibrid.info gjeti njoftimin e publikuar nga Prokuroria Speciale në faqen zyrtare në Facebook. Përmes këtij postimi, njoftohet se është arrestuar një person i nacionalitetit serb, i cili dyshohet për kryerjen e krimeve të luftës në komunën e Zveçanit, në veriun e Kosovës.
Prokuroria Speciale ka thënë se ai dyshohet se në cilësinë e komandantit të njësisë së Policisë në rajonin e Zveçanit, në kuadër të Ministrisë së Punëve të Brendshme (MUP) të Serbisë, gjatë viteve 1998/99 ka marrë pjesë në vrasje, dëbim, plaçkitje, torturë, e rrahje të civilëve shqiptarë. (shih këtu)
Në këtë njoftim nuk përmendet që “i arrestuari është ish-pjesëtar i PK-së”, siç u pretendua nga kanali në gjuhën serbe në Telegram.
Analiza:
Një postim i publikuar në Telegram nga kanali serb “Бункер” (BUNKER), që pretendon se personi i arrestuar më 15 maj si i dyshuar për krime lufte në Zveçan është ish-pjesëtar i Policisë së Kosovës, rezultoi i rremë.
Verifikimi nga Hibrid.info, në bazë të njoftimit zyrtar të Prokurorisë Speciale, konfirmoi se i arrestuari është ish-komandant i një njësie të Policisë së Serbisë (MUP) gjatë luftës 1998/99.
Bazuar në metodologjinë e punës, hibrid.info e vlerëson këtë pretendim si “Dezinformatë”.
Arsyetimi:
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.
