Një postim i publikuar në grupin e Facebook-ut “Lajmi Fundit”, nga profili “Kosova Sod”, pretendon se ish-presidenti i Kosovës, Hashim Thaçi, ka deklaruar se do të kthehet së shpejti në Kosovë dhe do ta rrëzojë nga pushteti kryeministrin Albin Kurti.
Në imazhin e publikuar me postimin shkruhet: “LAJM QË TRONDIT KREJT KOSOVËN!”, ndërsa pretendohet se Hashim Thaçi, në një video, ka thënë: “Do të vi në Kosovë shumë shpejt dhe do ta rrëzoj Albin Kurtin bashkë me ekipin e tij.”
Çka dihet për këtë post?
Deri në shkrimin e këtij artikulli, ky pëlqim ka marrë 73 pëlqime, 46 komente dhe 5 shpërndarje. Megjithatë, nuk ka dëshmi që Hashim Thaçi e ka bërë këtë deklaratë.
Postimi nuk ofron burim të besueshëm për deklaratën dhe videoja që pretendohet se e dëshmon atë nuk përputhet me përmbajtjen e pretenduar.
Vegëza e vendosur në postim çon në një video krejtësisht të palidhur me Hashim Thaçin. Adresa e YouTube-it hap një video me titullin “First Steps Song for Babies | Baby Walking Song | Toddler Learning Songs | Nursery Rhymes”, pra një përmbajtje për fëmijë, dhe jo një video politike apo deklaratë të Hashim Thaçit.
Profili “Kosova Sod” i cili e ka bërë këtë postim, është krijuar në Facebook më 17 gusht 2026, ndërsa të dhënat e profilit tregojnë se është përditësuar së fundmi. Ndërsa grupi në Facebook me emrin “Lajmi fundit” është grup publik me 5400 ndjekës.
Mospërputhja e linkut me pretendimin është veçanërisht domethënëse. Në vend që të ofrohet videoja origjinale që pretendohet se përmban deklaratën, përdoruesit i ofrohet një lidhje që çon në një material krejt tjetër. Kjo mund të përshkruhet si “deceptive linking”, ose përdorim mashtrues i lidhjeve, ku një URL paraqitet si dëshmi për një pretendim, ndonëse destinacioni i saj nuk e mbështet atë pretendim.
Analiza:
Nuk ka dëshmi se Hashim Thaçi ka deklaruar se do të kthehet në Kosovë “shumë shpejt” dhe se “do ta rrëzojë Albin Kurtin”.
Për më tepër, vegëza e vendosur si “provë” në postim çon në një video për fëmijë dhe nuk ka lidhje me pretendimin.
Bazuar në metodologjinë e punës së hibrid.info, pretendimi vlerësohet si i “Lajm i rremë”.
Arsyetimi:
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.