Ky raport monitorues për muajin mars 2026 paraqet një pasqyrë të keqinformimit bazuar në të dhënat e platformës hibrid.info, ku janë identifikuar gjithsej 35 raste, prej të cilave 94% në gjuhën shqipe. Format më të shpeshta përfshijnë lajme të rreme, mashtrime, dezinformata dhe përmbajtje të paverifikuara, ndërsa tematikisht dominojnë zhvillimet gjeopolitike si lufta SHBA/Izrael–Iran dhe narrativat politike vendore. Keqinformimi është përqendruar kryesisht në fushat e politikës dhe sigurisë, ndërsa shpërndarja ndodh kryesisht përmes mediave sociale, me dominim të theksuar të Facebook-ut.
Raporti evidenton gjithashtu përdorimin e institucioneve dhe figurave publike në narrativa të pasakta, ku Albin Kurti rezulton figura më e përmendur, i ndjekur nga një gamë e gjerë aktorësh vendorë dhe ndërkombëtarë. Raste të izoluara janë identifikuar edhe në gjuhën serbe dhe angleze, kryesisht të lidhura me sigurinë dhe sportin, të cilat shfrytëzojnë materiale të pavërteta ose të vjetra për të ndërtuar narrativa të rreme.
Në të njëjtën kohë, gjatë marsit është vërejtur edhe qarkullimi i narrativave serbe dhe ruse që synojnë rishkrimin e ndërhyrjes së NATO-s në vitin 1999, duke e paraqitur atë si agresion dhe duke mohuar krimet e dokumentuara në Kosovë. Këto narrativa bazohen në shtrembërim faktesh dhe propagandë, duke përfshirë pretendime të pabazuara për bashkëpunim me UÇK-në, trafikim organesh, si dhe interpretim të gabuar të ngjarjeve kyçe si Masakra e Reçakut dhe Rezoluta 1244.