Politika e Hibrid.info për korrigjime, ankesa, plotësime dhe demante
Hibrid.info është e përkushtuar ndaj saktësisë, transparencës editoriale dhe korrigjimit të menjëhershëm të çdo informacioni që mund të rezultojë i pasaktë, i paplotë ose që kërkon sqarim shtesë pas publikimit.
Ne ftojmë të gjitha mediat, institucionet, organizatat, personat publikë dhe subjektet e tjera që janë objekt i analizave, verifikimeve apo vlerësimeve tona, të paraqesin sqarime, fakte shtesë, ankesa ose kërkesa për korrigjim në rast se konsiderojnë se përmbajtja e publikuar nuk përputhet me faktet ekzistuese ose kërkon plotësim të mëtejshëm.
Çdo kërkesë trajtohet nga redaksia e Hibrid.info mbi bazën e dokumenteve, provave dhe burimeve të verifikueshme, në përputhje me standardet profesionale të fact-checking dhe etikës editoriale.
Si trajtohen kërkesat dhe ankesat
Pas pranimit të kërkesës apo ankesës, redaksia shqyrton informacionin e paraqitur dhe kryen verifikimet e nevojshme editoriale.
Nëse pas shqyrtimit konstatohet se publikimi përmban pasaktësi, mungesë informacioni ose formulim që kërkon sqarim, Hibrid.info ndërmerr korrigjimin përkatës.
Procesi i shqyrtimit trajtohet brenda dy dite pune, përveç rasteve kur nevojitet verifikim shtesë, konsultim me burime të tjera ose shqyrtim editorial më i zgjeruar.
Forma e korrigjimit dhe publikimit
Gabimet ose plotësimet reflektohen në një nga format e mëposhtme:
- korrigjimi bëhet drejtpërdrejt në analizën origjinale;
- tekstit i shtohet një shpjegim ose informacion plotësues;
- në fund të artikullit vendoset një shënim i qartë që tregon çfarë është ndryshuar;
- shënimi përmban datën e korrigjimit ose plotësimit.
Në rastet kur paraqitet kërkesë për demant, ajo trajtohet në përputhje me faktet e verifikuara dhe standardet editoriale të Hibrid.info.
Transparenca e plotë e procedurës
Për të garantuar transparencë dhe llogaridhënie publike, Hibrid.info e bën publike të gjithë procedurën e trajtimit të rasteve që lidhen me ankesa, korrigjime apo demante.
Kjo përfshin:
- ankesën ose reagimin e pranuar;
- komunikimin zyrtar të zhvilluar me palën ankuese;
- përgjigjen editoriale të Hibrid.info;
- dokumentet shoqëruese kur ato janë pjesë e procedurës;
- vendimin final editorial dhe korrigjimin eventual.
Në këtë mënyrë, çdo lexues ka mundësi të shohë të gjithë procesin e trajtimit të rastit, jo vetëm rezultatin përfundimtar.
Historiku publik i korrigjimeve dhe ankesave
Hibrid.info mban publik historikun e të gjitha korrigjimeve, plotësimeve, demanteve dhe rasteve të ankesave të trajtuara.
Çdo rast mbetet i dokumentuar në këtë rubrikë ose në artikullin përkatës, së bashku me datën e publikimit dhe përshkrimin e ndryshimeve të bëra.
Ky historik ruhet si pjesë e politikës së transparencës editoriale dhe llogaridhënies publike.
Si mund të dërgohet një kërkesë
Kërkesat për korrigjim, plotësim, reagim ose demant mund të dërgohen përmes kanaleve tona zyrtare të kontaktit: info@hibrid.info, ose përmes formularit të kontaktit në faqen tonë zyrtare.
Hibrid.info inkurajon që çdo kërkesë të trajtohet fillimisht përmes komunikimit të drejtpërdrejtë me redaksinë.
Mekanizmat e jashtëm të ankesës
Nëse pala kërkuese nuk është e kënaqur me trajtimin e kërkesës nga Hibrid.info, ajo mund të përdorë edhe mekanizmat ndërkombëtarë të ankesës në kuadër të rrjeteve profesionale ku Hibrid.info është anëtare dhe nënshkruese.
IFCN – International Fact-Checking Network
Si nënshkruese e Kodit të Parimeve të International Fact-Checking Network, Hibrid.info respekton standardet ndërkombëtare të transparencës, paanshmërisë dhe korrigjimit.
IFCN nuk shqyrton raste individuale editoriale, por pranon njoftime në rastet kur ekziston dyshim se një organizatë nënshkruese mund të jetë në shkelje të Kodit të Parimeve.
EFCSN – European Fact-Checking Standards Network
Në përputhje me Kodin Evropian të Standardeve të European Fact-Checking Standards Network, çdo individ apo organizatë që konsideron se një anëtar i EFCSN ka dështuar seriozisht në respektimin e standardeve profesionale mund të paraqesë ankesë pranë EFCSN, pasi të ketë ndjekur fillimisht procedurën e brendshme me organizatën.
Formulari zyrtar për paraqitjen e ankesës:
https://docs.google.com/forms/d/e/1FAIpQLSeYX55Vn4L7tSYtPRMnrp6oHjBaYu6EQM1cPDMMiG-sajqj-A/viewform
Informacion shtesë: EFCSN complaints page