Faqja në Facebook “Al Press Ora” të enjten (16 prill) ka publikuar një postim, përmes së cilit pretendon se profesori në Shkollën Ekonomike (LSE), James Ker-Lindsay, ka deklaruar se shërbimi sekret serb ka një departament të posaçëm që merret vetëm me diasporën kosovare dhe se urrejtja më e madhe ndaj UÇK-së buron nga ky drejtim. Sipas këtij pretendimi, thuhet se shërbimi analitik serb ka arritur të dominojë në këtë fushë.
E vërteta?
Pas hulumtimit të kryer online, u vërtetua se James Ker-Lindsay nuk ka bërë një deklaratë të tillë. Ky pretendim nuk është gjetur i publikuar në asnjë media kredibile.
Hibrid.info ka kryer fillimisht kërkime në Google lidhur me këtë pretendim, por nuk ka gjetur asnjë dëshmi se një deklaratë e tillë është publikuar në media apo burime kredibile (këtu).
Po ashtu, kërkimi është zgjeruar edhe në gjuhën angleze, pa rezultuar në ndonjë burim që do ta mbështeste pretendimin e bërë nga faqja e lartcekur (këtu).
Hera e fundit që James Ker-Lindsay ka folur për media në gjuhën shqipe, sipas gjetjeve online, është në qershor 2025. Në një artikull të publikuar nga Radio Evropa e Lirë, ai ka folur për krizën politike në Kosovë, duke theksuar mungesën e vëmendjes ndërkombëtare dhe vështirësitë në zgjidhjen e ngërçit institucional.
Analiza
Përmes një postimi në Facebook u pretendua se James Ker-Lindsay ka deklaruar se shërbimi sekret serb ka një departament për diasporën kosovare dhe se urrejtja ndaj UÇK-së buron nga ky drejtim.
Pas verifikimit të kryer online, nuk është gjetur asnjë deklaratë e tillë në media apo burime kredibile, as në kërkimet në gjuhën shqipe dhe as në atë angleze.
Sipas gjetjeve online, hera e fundit që James Ker-Lindsay ka folur për media në gjuhën shqipe është në qershor 2025, kur kishte komentuar krizën politike në Kosovë dhe mungesën e vëmendjes ndërkombëtare.
Bazuar në metodologjinë e punës, hibrid.info e vlerëson këtë përmbajtje si “Lajm i rremë”.
Arsyetimi
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.