Në një sesion informues të zhvilluar në ambientet e American Corner në Prizren, përfaqësues nga mediat lokale, shoqëria civile dhe aktivistë të tjerë u mblodhën për të diskutuar për ndikimin e dezinformimit dhe formave të tjera të çrregullimit informativ. Pjesëmarrësit patën mundësinë të eksploronin mekanizmat për dekonstruktimin dhe identifikimin e shembujve konkretë të dezinformimit të cilat janë publikuar më herët, duke u përqendruar në një qasje praktike.
Projekti “Countering Disinformation Narratives through Innovation and Experiential Learning,” i organizuar nga organizata ADS dhe Hibrid.info në bashkëpunim me Ambasadën e SHBA-ve, shërbeu si një shembull i angazhimit të përbashkët ndërkombëtar për të luftuar këtë sfidë të rëndësishme të shoqërisë së informacionit. Nëpërmjet mbështetjes së ndërsjellë dhe edukimit të pjesëmarrësve, ky projekt synonte të promovonte një kulturë të ndërgjegjësimit dhe të kritikës së informacionit.
Sesionet e tilla informuese dhe praktike synojnë përmirësimin e nivelit të vetëdijes dhe aftësive të komunitetit përballë sfidave të dezinformimit. Përmes këtyre aktiviteteve, hibrid.info vazhdon të luajë një rol kyç në përmirësimin e aftësive të qytetarëve për të kuptuar dhe dalluar mes informacionit të saktë dhe dezinformimit.
