Shkroi: Fatbardh Dema
Përmes një postimi në formë imazhi në të cilin shfaqen kryeministri në detyrë, Albin Kurti dhe presidentja Vjosa Osmani, pretendohet se ata janë parë duke pirë kafen e mëngjesit së bashku në një ambient publik.
Në këtë postim të publikuar të premten (9 janar) nga faqja “Shqip-Al” në Facebook, tutje pretendohet se ky është një takim joformal, i cili është parë nga një pjesë e opinionit publik si shenjë e bashkëpunimit institucional mes Kryeministrisë dhe Presidencës.
E vërteta?
Pas verifikimit u vërtetua se imazhi nuk është real.
Hibrid.info vërtetoi se imazhi është i gjeneruar me inteligjencë artificiale. Këtë e bëri duke përdorur platformën për detektim të imazheve të gjeneruar me inteligjencë artificiale, “HiveModeration.com”. (shih fotografinë më poshtë)
Edhe përmes kërkimit në Google me fjalët kyçe “Albin Kurti dhe Vjosa Osmani janë parë duke pirë kafen e mëngjesit së bashku në një ambient publik”, nuk shfaqet asnjë informacion i publikuar së fundmi në media kredibile. (shih këtu)
Deri në shkrimin e këtij artikulli, postimi i publikuar nga faqja “Shqip-Al” ka grumbulluar gjithsej 804 reagime, 182 komente dhe 11 shpërndarje. (shih këtu)
Duke u bazuar në komentet e bëra në këtë postim, vërehet se një pjesë e madhe e audiencës e kanë marrë si të vërtetë lajmin dhe imazhin. (shih fotografinë më poshtë)
Analiza:
Përmes një postimi me imazh të publikuar më 9 janar nga faqja “Shqip-Al” në Facebook, është pretenduar se kryeministri në detyrë, Albin Kurti, dhe presidentja Vjosa Osmani janë parë duke pirë kafen e mëngjesit së bashku në një ambient publik.
Ky pretendim është interpretuar si shenjë e një takimi joformal dhe bashkëpunimi institucional.
Pas verifikimit nga Hibrid.info u vërtetua se imazhi nuk është real, por i gjeneruar nga inteligjenca artificiale, me një probabilitet 99.9%, sipas platformës “HiveModeration”. Po ashtu, nuk u gjet asnjë informacion i publikuar nga media kredibile që konfirmojnë një takim të tillë.
Bazuar në metodologjinë e punës, hibrid.info e vlerëson këtë përmbajtje si “Lajm i rremë” dhe “Mashtrim”.
Arsyetimi:
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.