Medium në gjuhën serbe “informer.rs” ka publikuar dje një artikull me pretendimin se mediat e afërta me Albin Kurtin po e sulmojnë Serbinë dhe mbështesin protestat e opozitës në Serbi.
“Informer.rs” këtë pretendim e ngrit duke u bazuar në raportimin lidhur me reagimin e kryeministres së Serbisë, Ana Bërnabiq kundrejt opozitës serbe.
Pas hulumtim të bërë është gjetur se pretendimi është i pa bazë.
Vegëza e artikullit të publikuar në “Informer.rs”:
https://informer.rs/vesti/politika/795430/ana-brnabic-aljbin-kurti-mediji-napad
Pjesë të artikullit të publikuar në “Informer”:
Mediat nën kontrollin e kryeministrit të shtetit fals nuk e humbën rastin të sulmojnë Serbinë dhe të mbështesin protestat e dhunshme që u zhvilluan mbrëmë në kryeqytet.
Kujtojmë se gjatë diskutimit të nxehtë parlamentar të djeshëm, kryeministrja e Serbisë, Ana Brnabiq, e ka dënuar sjelljen e opozitës në këtë institucion si të turpshme.
Pretendimi i mediumit në gjuhën serbe se është sulmuar kryeministrja e Serbisë, Ana Bërnabiq, nga mediat e Kurtit është tërësisht i pa pabazë. Me cilësimin “godet kryeministren”, ky medium nuk e ka sqaruar se çfarë gabimi profesional ka bërë “gazetaexpress.com” në këtë rast.
Nga analiza e bërë artikullit të “gazetaexpress.com”, shihet se përmbajtja paraqet vetëm një përshkrim të reagimit të kryeministres serbe (shih artikullin këtu), që paraqitet në një video të shkëputur nga një fjalim (debat) i saj në Kuvendin e Serbisë.
Pjesë nga artikulli i “gazetaexpress.com”:
Kryeministrja e Serbisë, Ana Bërnabiq nuk ka mundur ta kontrollojë nervozën sot në Parlamentin serb, gjatë përplasjeve me opozitën, ku pati disktuime të ashpra.
Një moment ka humbur, ajo humb kontrollin dhe e godet me forcë mikrofonin para saj.
“Turp ju qoftë”, i drejtohet me zë të lartë opozitës Bërnabiq.
Një këngëtare serbe, me emrin Seka Aleksiç e ka komentuar videon duke shkruar me ironi se ajo reagon në këtë formë kur i vendosin produktin e gabuar në hamburger.
Nga ajo që shihet në artikull, autori ka përshkruar reagimin e nervozuar të kryeministres Bërnabiq (shih videon e plotë të debatit të Bërnabiq këtu) dhe ka publikuar e komentuar edhe një koment të një këngëtare serbe të quajtur “Seka Aleksiq”, të postuar në Twitter që ndërlidhet me ngjarjen (këtu).
Gjithashtu, ky medium serb pretendon se “sulmi ndaj Bërnbiqit” u bë nga mediume të afërta me Kurtin, duke aluduar me kryeministrin e Kosovës.
Edhe këtë pretendim e kanë të pabazuar. Në fakt, “gazetaexpress.com” me emrin biznesor ‘Media Works’ janë në pronësi të “A.B.C. MANAGEMENT”, që për pronar ka sipërmarrësin nga Shqipëria, Klodian Allajbeu, dhe drejtohet nga Leonard Kerquku. (këtu)
Pra, nuk ka ndonjë ndërlidhje të këtij mediumi me kryeministrin Kurti që mund të bëhet në aspektin e pronësisë dhe as të politikës redaktuese, siç pretendon “Informer.rs”.
Analiza:
Pretendimi se është sulmuar kryeministrja e Serbisë nga mediat e kontrolluar nga Kurti është i pa bazë. Pas hulumtimit të bërë është gjetur se “gazetaexpress.com”, të cilës i referohet mediumi në gjuhën serbe, ka raportuar për sjelljen e Bërnabiqit gjatë përplasjes me opozitën në parlamentin e Serbisë.
Për më tepër, “gazetaexpress.com” nuk është medium nën kontrollin e Kurtit, siç pretendohet nga “Informer.rs”.
Bazuar në metodologjinë e punës, hibrid.info këtë pretendim e vlerëson si “dezinformatë”.
Vlerësimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
