Faqja në Facebook me emrin “Kredi personale” ka publikuar një postim dhe imazh me mbishkrim të datës 19 gusht, ku pretendohet se ofrohet kredi deri në 50 mijë euro për StartUp biznese.
Pretendimi është hulumtuar dhe vërtetuar nga hibrid.info, si mashtrim nga faqja në fjalë.
Hibrid.info ka gjetur të njëjtin postim bashkë me imazhin i cili është marrë nga një njoftim në faqen zyrtare të bankës ProCredit.
Vegëza e postimit në Facebook nga faqja “Kredi personale”:
Pas verifikimit dhe gjetjeve nga hibrid.info, është kuptuar se faqja “Kredi personale” ka marrë njoftimin e bërë më date 16 gusht nga Banka ProCredit, duke ndërhyrë dhe deformuar pjesën e logos në imazh si dhe duke e paraqitur njoftimin në fjalë si mundësi të ofruar nga kjo faqe. (shih këtu)
Fotografitë krahasuese
Po ashtu hibrid.info, duke u bazuar në faktin se postimi është bërë në gjuhën shqipe, ka kërkuar edhe në listën e institucioneve financiare që mundësojnë kredi në shtetet shqip-folëse, Kosovë dhe Shqipëri, por që nuk ka gjetur gjurmë të faqes në fjalë. (shih këtu dhe këtu)
Tjetër fakt shtesë që e bën më të dyshimtë faqen “Kredi personale” në Facebook, është mungesa e të dhënave të mjaftueshme, që do ta dëshmonin kredibilitetin apo besueshmërinë dhe transparencën, në seksionin e informacioneve rreth veprimtarisë (about) në faqen “Kredi personale”. (shih këtu)
Nuk është hera e pare që e njëjta faqe publikon postime të tilla. (shih këtu, këtu dhe këtu)
Analiza:
Hibrid.info pas verifikimit të fakteve, ka vërejtur se faqja “Kredi personale” në Facebook. ka përdorur kampanjë të bankës ProCredit, duke e publikuar si ofertë dhe mundësi për kredi nga kjo faqe.
Duke u bazuar në metodologjinë e punës, hibrid.info e ka vlerësuar këtë publikim si “Mashtrim”.
