Twitter ka pezulluar një numër llogarish të rreme që pretendojnë të drejtohen nga mbështetës afrikano-amerikanë “black supporters” të Presidentit Donald Trump.
Kompania (Twitter) tha se llogaritë thyen rregullat mbi spam-at dhe bënë manipulim të platformës, si dhe njoftuan se mund të pezullojnë më shumë llogari që konstatohet se shkelin këto politika.
Washington Post së pari raportoi hetimin, duke gjetur mbi një duzinë llogarish të cilat përdorën gjuhë identike të përbërë nga frazat si “Unë jam i zi dhe e votoj Trump-in”.
Një përmbledhje e disa prej llogarive të pezulluara tregon se ata shpesh përdornin imazhe të vjedhura për t’u dukur reale, të tilla si fotot e burrave të zi nga artikujt e lajmeve. Ata ndonjëherë pretendonin se ishin në pronësi të veteranëve ushtarakë.
Darren Linvill, një studiues i dezinformimit të mediave sociale në Universitetin Clemson, gjeti dhjetëra llogari të tilla të cilat kishin gjeneruar rreth 265,000 ri-cicërima (retweets).
Ai i tha agjencisë së lajmeve Reuters se të gjitha llogaritë që ai kishte monitoruar, janë larguar nga Twitter, por me këtë nuk ka arritur të largohet edhe ndikimi që e kanë pasur te lexuesit.
Në gusht NBC News raportoi operacione të padëshiruara nga llogari të rreme që paraqiteshin si mbështetës të zi të Trump, disa prej të cilave ishin në gjendje të tërhiqnin mijëra ndjekës para se të pezulloheshin. Një cicërimë, për shembull, mblodhi më shumë se 10,000 ri-cicërima përpara se të hiqej.
