Keqinformimi rreth vaksinave ka qenë një çështje e përhapur për vite me radhë në rrjetin social Facebook, dhe vetëm në fillim të këtij viti kjo platform më në fund prezantoi politika që do të adresonin problemin.
Tani, ky rrjet social i ka zgjeruar ato politika dhe përpjekjet e tij për vaksinimin e fëmijëve kundër COVID-19, menjëherë pasi FDA autorizoi përdorimin urgjent të vaksinës Pfizer për fëmijët e moshës pesë deri në njëmbëdhjetë vjeç, shkruan engadget.com.
Në javët e ardhshme, Facebook do t’u dërgojë përdoruesve në SHBA një rikujtues në gjuhën angleze dhe spanjolle, se vaksina kundër COVID-19 është tashmë e disponueshme për fëmijët. Këto kujtime do të përfshijnë gjithashtu një lidhje që do t’i ndihmojë përdoruesit të gjejnë vendin më të afërt të vaksinimit.
Ndoshta, më e rëndësishmja, ajo do të zgjerojë politikat e saj të dezinformimit kundër vaksinave për të hequr pretendimet se vaksinat kundër COVID-19 nuk ekzistojnë dhe se vaksina për fëmijët është e patestuar. Gjithashtu do të heqë çdo pretendim se këto vaksina mund të vrasin ose dëmtojnë seriozisht fëmijët, se ato nuk janë aspak efektive për fëmijët dhe se çdo gjë tjetër përveç një vaksine kundër COVID-19 mund t’i inokulojë fëmijët kundër virusit.
Nga Facebook thonë se lufta e tyre kundër dezinformatave të vaksinave është pjesë e një përpjekjeje të vazhdueshme në partneritet me CDC, OBSH dhe autoritete të tjera shëndetësore. Ky rrjet social premton të vazhdojë të përditësojë politikat e tij dhe të ndalojë çdo pretendim të ri në lidhje me vaksinën kundër COVID-19 për fëmijët që do të shfaqet në të ardhmen.
Faqja e internetit, e cila tani funksionon nën kompaninë e saj meme të quajtur Meta, thotë se ka hequr më shumë se 20 milionë pjesë të përmbajtjes nga Facebook dhe Instagram që nga fillimi i pandemisë. Ndërsa nga gushti i vitit 2021, ajo ka ndaluar gjithashtu 3 mijë llogari, grupe dhe faqe për shkelje të vazhdueshme të politikave të saj të dezinformimit shëndetësor.