“Serbia e di që, nëse e inskenon një kërcënim kundër Kurtit, e fuqizon atë në zgjedhje. Pra, e bën me qëllim. Njësoj e bëri Rusia në Hungari: vendosi një eksploziv në një gyp ku transmetohej gazi, për ta forcuar Orbanin”. Kështu pretendohet të ketë thënë gazetari gjerman Peter Tiede, sipas një postimi të publikuar të dielën (10 maj), nga llogaria me emrin “Mërgata me LDK-në”.
Postimi është shoqëruar me tekstin “Rrenat e tejdukshme ai kodosh. Nuk po i hajnë më rrenat e tij siç i hanin më parë”.
E vërteta?
Pas verifikimit të fakteve të kryer nga hibrid.info, u vërtetua se deklarata e pretenduar e gazetarit gjerman të “Bild” është e sajuar.
Fillimisht, hibrid.info ka kontrolluar në rrjetet sociale ekzistuese të gazetarit dhe vërejti se ai zakonisht shpërndan përmbajtje në llogarinë e tij në platformën “X” (shih këtu). Nga postimet e tij të kohëve të fundit, nuk është hasur ndonjë, ku ai të ketë shprehur qëndrime lidhur me çështjet e ngritura në pretendimin në fjalë.
Tutje, hibrid.info ka kërkuar në Google me fjalët kyçe “Peter Tiede Albin Kurti.”, “Peter Tiede Serbia e di që, nëse e inskenon një kërcënim kundër Kurtit, e fuqizon atë në zgjedhje” dhe me fjalët kyçe në gjuhën gjermane “Peter Tiede Serbien Kurti Russland Ungarn” por që nuk është gjetur asnjë publikim lidhur me këtë deklaratë në asnjë burim kredibil (shih këtu, këtu dhe këtu).
Faqja që ka publikuar postimin ka afro 8 mijë ndjekës dhe publikon përmbajtje në mbështetje të Lidhjes Demokratike të Kosovës (LDK-së).
Deri në momentin e trajtimit përmbajtja ka nxitur reagime duke marrë mbi 100 pëlqime.
Kjo nuk është hera e parë që hibrid.info trajton përmbajtje të publikuara nga kjo faqe, të cilat rezultojnë të jenë të pavërteta. Madje, vetëm gjatë dy javëve të para të këtij muaji (1-10 maj 2026), janë trajtuar një dezinformatë (shih këtu) dhe dy lajme të rreme (shih këtu dhe këtu).
Analiza:
Përmes një postimi në Facebook u pretendua se gazetari gjerman Peter Tiede ka deklaruar se “Serbia e di që, nëse e inskenon një kërcënim kundër Kurtit, e fuqizon atë në zgjedhje. Njësoj e bëri Rusia në Hungari: vendosi një eksploziv në një gyp ku transmetohej gazi, për ta forcuar Orbanin.”
Pas verifikimit të kryer online, nuk është gjetur asnjë deklaratë e tillë në media apo burime kredibile, në gjuhën shqipe dhe në gjuhën gjermane.
Bazuar në metodologjinë e punës, hibrid.info e vlerëson këtë përmbajtje si “Lajm i rremë”.
Arsyetimi
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.