Një kanal në YouTube me emrin “Perditesuesi” ka publikuar (1 mars) një video-material, të titulluar “DO NGELESH NE ZEMRAT TONA!Andresa i jep fund jetes!”.
Video-materiali në fjalë, pretendon se prezantuesja braziliane e cila jeton në Shqipëri, e njohur nga programi televiziv “E diela shqiptare”, i ka dhënë fund jetës. Por, verifikimi i fakteve nga hibrid.info, ka hedhur poshtë pretendimin e lartcekur.
Video-materiali në fjalë, deri në momentin e trajtimit, numëron afër 284 mijë shikime, ndërsa, kanali që e ka publikuar ka 14 mijë e 700 ndjekës.
Vegëza e video-materialit të publikuar në YouTube nga kanali “Perditesuesi”:
https://www.youtube.com/watch?v=Ti8r8Jp3r80
Pas hulumtimit nga hibrid.info, me anë të makinës së kërkimit, “Google”, nëpërmjet fjalëve kyçe “nderron jete andresa ambrosio”, janë gjetur informatat e fundit në lidhje me modelen braziliane, të cilat tregojnë se ajo është bërë nënë, gjë e cila duket se e ka mbajtur jashtë televizionit kohëve të fundit (shih këtu).
Pra, nuk ka asnjë informatë të publikuar në media që konfirmojnë pretendimin e kanalit në Youtube “Perditesuesi”.
Po ashtu hibrid.info ka kontrolluar edhe rrjetet sociale të moderatores, ku publikimet e fundit të saj, datojnë nga muaji i kaluar (shih këtu dhe këtu).
Analiza:
Pretendimi i një video-materiali, se moderatorja braziliane, e cila jeton në Shqipëri, Andresa Ambrosio, i ka dhënë fund jetes, nuk është i vërtetë.
Pas verifikimit të fakteve, nuk janë gjetur burime kredibile që e konfirmojnë pretendimin në fjalë.
Bazuar në metodologjinë e punës, hibrid.info e vlerëson këtë video-material, si “Lajm i rremë”.
Vlerësimi:
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
