Shkroi: Fatbardh Dema
U publikua një artikull me titull “Rrëzohet helikopteri ushtarak, humbin jetën 8 persona”, bashkangjitur me një fotografi ku shfaqen tre helikopterë afër një ure.
Ky artikull u publikua sot (7 gusht) nga mediumi online në gjuhën shqipe “Kosova-sot.info”.
Çka nuk shkon me këtë artikull?
Pas hulumtimit të kryer nga hibrid.info u vërtetua se titulli është përgjithësues që nuk sqaron se ngjarja ka ndodhur në shtetin e Ganës. Ndërsa fotografia është e realizuar në Kosovë gjatë vitit 1999.
Portali informativ “Kosova-sot.info” është i regjistruar në Kosovë, në Agjencinë e Regjistrimit të Bizneseve (ARBK) dhe ka shumicën e lexuesve shqipfolës (këtu), andaj edhe mosqartësimi në titull se ku ka ndodhur ngjarja, mund të lë vënd për keqinformim se bëhet fjalë ngjarje të ndodhur në hapësirat shqipfolëse.
Vetëm pas klikimit të artikullit, në përmbajtje sqarohet se “Ministri i Mbrojtjes dhe ai i Mjedisit të Ganës janë midis tetë personave të vrarë pasi një helikopter ushtarak u rrëzua në rajonin jugor Ashanti të mërkurën”.
Për ta vërtetuar edhe më shumë se rasti ka ndodhur në Ganë, hibrid.info ka gjetur artikullin e publikuar në mediat e huaja si “Al Jazeera” e “CNN”.
Përveç titullit përgjithësues, në këtë artikull as fotografia nuk përputhet me lajmin. Hibrid.info ka verifikuar origjinën e kësaj fotografie dhe ka zbuluar se ajo është realizuar në vitin 1999 në Kaçanik. Fotografia është gjetur e publikuar në platformën e njohur për shpërndarje të imazheve, “GettyImages”. (shih këtu)
Përshkrimi i fotografisë së publikuar në “GettyImages”, i përkthyer në shqip:
Helikopterët britanikë të transportit ushtarak “Puma” fluturojnë mbi një urë që të çon në Kaçanik më 13 qershor 1999, duke sjellë një valë tjetër ushtarësh dhe pajisjesh në Kosovë. Trupat britanike të NATO-s hynë në Kosovë më 12 qershor si pjesë e forcave ndërkombëtare paqeruajtëse për Kosovën (KFOR).
Analiza:
Portali “Kosova-sot.info” publikoi një artikull me titullin “Rrëzohet helikopteri ushtarak, humbin jetën 8 persona”, i cili ishte i shoqëruar me një fotografi të tre helikopterëve afër një ure.
Pas verifikimit të fakteve, hibrid.info ka vërtetuar se titulli është përgjithësues dhe nuk tregon se ngjarja ka ndodhur në Ganë, çka mund të çojë në keqinformim të lexuesve shqipfolës. Po ashtu, fotografia e përdorur nuk lidhet me rastin. Ajo është realizuar në Kaçanik më 1999 dhe është publikuar në platformën “GettyImages”.
Bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
“Clickbait” vlerësohen ato përmbajtje informative titulli i të cilave është përgjithësues dhe nuk bënë të ditur vendndodhjen e ngjarjes, kontekstin dhe relevancën. Tekste dhe artikuj të tillë synojnë të tërheqin vëmendjen e audiencës me tituj sensacionalë me pasojë çorientuese, që nuk e qartësojnë saktësisht përmbajtjen e artikullit. Titujt “clickbait” bëhen kryesisht për të tërhequr lexueshmëri në rastin e publikimeve mediatike dhe/ose për të fituar nga klikimet në rastet e publikimeve komerciale.
