Faqja e dyshimtë në Facebook me emrin e bashkëshortes së biznesmenit dhe politikanit kosovar, Behgjet Pacolli – Maria Pacolli, rezulton të jetë faqe mashtruese.
Në kuadër të kësaj faqeje që mbanë emrin “Maria_Pacolli-Cash” dhe fotografinë e gruas së ndërmarrësit Pacolli, është bërë një postim me pretendimin se është organizuar një lojë shpërblyese e cila konstatohet të jetë mashtrim.
Me anë të kësaj faqeje tentohet të vihen në lajthitje ndjekësit, përmes postimit – “Duke filluar nga sot do të votoj 500 me fat në facebook.! Befasoni në 24 orët e ardhshme. Zgjidhni shkronjat e para të emrit tuaj dhe fitoni një çmim në emrin tuaj. Beje tani!![A] 50 000 €, ku me pas vazhdon me uljen e çmimit të fituesit”.
Vegëza e faqes së dyshimtë të Facebook-ut, “Maria_Pacolli-Cash”:
Në bazë të analizës së fakteve të kontrolluara nga hibrid.info, rezulton se ky postim me pretendimin për organizim të lojës shpërblyese, është një mashtrim, meqenëse fotografia e bashkangjitur del të jetë e vjetër dhe jo autentike. Pas kontrollit të fakteve konstatohet se kjo foto i përgjigjet një ngjarje krejtësisht tjetër – takimit të ish-ministrit të Kulturës Rinisë dhe Sportit (MKRS), Kujtim Gashi dhe Sekretarit Permanent, Veton Firzi, me Maria Pacollin (gruaja e Behgjet Pacollit), për të nënshkruar një Memorandum Bashkëpunimi me fondacionin “Ibrahim Kodra – Swiss Foundation”, që udhëhiqet nga kjo e fundit. Ky takim ishte realizuar më 13 prill të vitit 2018. Pra, i gjithë pretendimi i bërë nga kjo faqe për organizimin e një loje shpërblyese, del të jetë një mashtrim. Edhe publikimi i fotografisë së kësaj ngjarje, hedhë poshtë pretendimin e kësaj faqe mashtruese për organizimin e një loje shpërblyese.
“Në kabinetin e ministrit të Kulturës, Rinisë dhe Sportit, Kujtim Gashi, është nënshkruar edhe një memorandum bashkëpunimi me “Ibrahim Kodra-Swiss Foundation”.
Qëllimi i këtij memorandumi është mbështetja financiare për aktivitetet e arkitektëve të rinj nga Kosova me rastin e pjesëmarrjes në ngjarjen kolaterale “New Urbanistic” në Bienalen e Arkitekturës së Venedikut për vitin 2018, për promovimin dhe përkrahjen kulturore, gjatë vitit 2018″, thuhet në njoftimin e MKRS-së.
Fotografia e publikuar në portalin e MKRS-së më 13 prill të vitit 2018:
https://www.mkrs-ks.org/?page=1,170,1716#.X_R6ndhKjIU
Kjo lojë mashtruese, është shpërndarë mbi 176 herë nga ndjekësit e kësaj faqe, ndërsa ka gjeneruar rreth 220 komente .
Po ashtu, duhet cekur se kjo faqe u hap me 04 janar 2021 ku me anë të 2 postimeve mashtruese, vetëm për një ditë, ka arritur t’i mbledhë 104 pëlqime dhe 150 ndjekës.
Analiza:
Pas procesit të kontrollit të fakteve dhe analizës së tyre, rezulton se vërtetësia e faqes së kontrolluar me emrin “Maria_Pacolli-Cash”, është e dyshimtë. Duke qenë se fotografia e publikuar në ilustrimin e postimin e lojës shpërblyese nuk është autentike dhe i përgjigjet një ngjarje krejtësisht tjetër, hibrid.info e vlerëson këtë faqe në Facebook si “mashtrim”.