Kategoritë: #lajm i rremë, #shpërndarje e lajmit të rremë, #raportim i njëanshëm, #dezinformatë
Pak para formimit të qeverisë së re të përbërë nga LDK, AAK, Nisma dhe Lista Serbe, të udhëhequr nga kryeministri Avdullah Hoti, disa media kishin deklaruar se gazetari, Berat Buzhala, është një nga emrat që do të jetë pjesë e këtij kabineti në postin e ministrit.
Disa media online kishin publikuar këtë lajm për pronarin e “gazetaexpress” dhe televizionit “T7”, por duke mos kërkuar konfirmim nga vet Buzhala. Lajmi është shpërndarë nga mediumi Kosova.LIVE, duke iu referuar disa burimeve të sigurta. I njëjti lajm është cituar edhe nga media tjera.
Më poshtë mund të lexoni verifikimin e saktësisë së këtyre lajmeve.
Lajmi i rremë:
“Pas interpretimit të Gjykatës Kushtetuese, pjesëtarët e LDK-së deklaruan se nuk do ju marri shumë kohë formimi i qeverisë së re.
I dekretuar nga Presidenti për të formuar shumicën e re të mjaftueshme për krijimin e institucioneve të reja është Avdullah Hoti.
LDK, AAK e NISMA deklarojnë se kanë numrat e nevojshëm për këtë proces. Ende nuk është bërë e ditur se si do të ndahen postet mes partive.
Sot Kosova.LIVE nga burime të sigurta merr vesh se Drejtori i Gazeta Express dhe T7, Berat Buzhala, do të jetë njëri nga ministrat e kabinetit të ri qeveritar.
Ende nuk dihet se cilën ministri përkatëse do t’a drejtoj Buzhala.
Kujtojmë se Berat Buzhala ishte deputet në Kuvendin e Kosovës nga radhët e Partisë Demokratike të Kosovës në periudhën 2011-2013, si dhe anëtar në Komisionin për Zhvillim Ekonomik, Infrastrukturë, Tregti dhe Industri”.
Disa nga titujt e këtij lajmi të rremë të publikuar nga mediat:
https://www.gazetaprishtina.info/berat-buzhala-njeri-nga-ministrat-ne-qeverine-hoti/
https://shkruje.com/ekskluzive-berat-buzhala-njeri-nga-ministrat-ne-qeverine-hoti/
https://gazetakonkrete.com/ekskluzive-berat-buzhala-njeri-nga-ministrat-ne-qeverin-hoti/
Verifikimi:
Vetë gazetari Berat Buzhala, përmes një postimi në llogarinë e tij në Facebook, i ka quajtur këto publikime në media si “spekulime të cekëta“, gjë që ka lënë të kuptohet se janë të pavërteta.
Redaksia e hibrid.info këtë lajm e ka kategorizuar si lajm të rremë, shpërndarje të lajmeve të rreme, raportim të njëanshëm dhe dezinformatë. Më poshtë mund të lexoni arsyetimin e këtyre kategorizimeve.
Lajm i rremë
Vlerësimin “Lajm i rremë” e marrin ato raportime mediatike që janë tërësish prodhim i një mediumi i cili në vete përmban pretendime ose informacione faktikisht të gabuara.
Përmbajtja që vlerësohet si lajm i rremë mund të përcaktohet me siguri se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.
Shpërndarje e lajmeve të rreme
Ky vlerësim u jepet raporteve të mediave në të cilat transmetohet përmbajtja origjinale e një mediumi tjetër, i cili përmban një lajm të rremë. Vlerësimi jepet vetëm për transmetimin e përmbajtjes që kategorizohet si lajm i rremë.
Raportim i njëanshëm
Vlerësim si “Raportim i njëanshëm” merr ai raport mediatik i cili vërehet qartë se bënë favorizim të fakteve, qëndrime dhe përfundime që përputhen me një narrativë të veçantë, shpesh duke mos respektuar rregullin e kontaktit me palën tjetër kur bëhet fjalë për pretendime që janë të dëmshme për reputacionin e dikujt ose të portretizuar nga akterë të caktuar me një qasje negative. Një nga format e raportimit të njëanshëm është paraqitja selektive e fakteve, ku theksohen fakte që mbështesin një tezë të caktuar, ndërsa faktet që nuk e konfirmojnë atë janë lënë pas dore.
Dezinformata
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
