Domenet e dy mediave ruse pro-pushtetit (Kremlinit), “Sputnik” dhe “RT Balkan” të bllokuara për audiencën digjitale të Kosovës, tash e një kohë janë të qasshme për secilin që kërkon ti vizitojë këto ueb-faqe në internet.
Ndonëse Qeveria e Kosovës kishte marrë vendim për ndalimin e mediave pro-qeveritare ruse në vendin tonë, pas hulumtimeve të kryera, hibrid.info ka arritur të verifikojë se qasja në këto dy portale ruse, tashmë është e mundshme.
Përderisa agjencia e lajmeve Sputnik, për audiencën digjitale të Kosovës është e qasshme në dy shërbimet, në atë ndërkombëtar dhe në gjuhën serbe, mediumi Russia Today ofrohet vetëm në shërbimin për Ballkanin – RT Balkan.
Vegëzat e ueb-faqeve të Sputnikglobe, Sputnik-Serbia dhe RT-Balkan të qasshme për publikun kosovar.
Më 24 mars, 2022, Qeveria e Kosovës kishte ndërmarrë një sërë sanksionesh në raport me Rusinë, të vendosura nga Këshilli i Bashkimit Evropian dhe SHBA-të, ndaj veprimeve destabilizuese të Rusisë lidhur me situatën në Ukrainë, ndër të cilat parashihej edhe ndalimi i transmetimit të mediave propaganduese të Rusisë në Kosovë. (shih vedimin këtu)
Vendimi i marrë nga qeveria, ishte udhëzuar të zbatohet nga ofruesit e shërbimeve të internetit (ISP) në vendin tonë, edhe nga Autoriteti Rregullativ i Komunikimeve Elektronike dhe Postare (ARKEP), (25 mars, 2022) institucion i cili mbikëqyrë politikat e zhvillimit të fushës së komunikimeve elektronike dhe të shërbimeve postare të përcaktuara nga Qeveria (shih këtu).
Megjithatë, nga hulumtimit i hibrid.info është vërtetuar se ofruesit kryesorë të shërbimeve të internetit në Kosovë, si “Vala”, “IPKO” e “ArtMotion” kanë zhbllokuar këto domene për klientët e tyre. Nuk dihet nëse ka ndryshim të vendimit qeveritar, i cili pritet të vlejë deri në ndryshimin e situatës së luftës në Ukrainë. Prandaj hibrid.info, ka tentuar të kontaktojë me ARKEP-in, për të marrë më shumë informata rreth kësaj çështjeje, por që këta të fundit nuk kanë dhënë një përgjigje deri në këto momente.
Përderisa mediat ruse duket se kanë gjetur shtegdalje për veprimtarinë e tyre në Kosovë, situata duket e njëjtë edhe në vendet e BE-së. Një artikull i publikuar në ueb-faqen e Institutit Reuters bashkë me Universitetin e Oksfordit (30 mars,2022), tregon për lulëzimin e propagandës ruse në vendet spanjisht folëse, të Amerikës Latine, duke përfshirë edhe Spanjën, që është vend anëtar i BE-së, pavarësisht ndalimit të mediave ruse (shih këtu).
Artikulli pohon edhe përdorimin e influencerëve në Spanjë nga Kremlini, për përhapjen e mesazheve për pushtimin rus në Ukrainë.
Duhet përmendur që vendimi i Qeverisë ishte marrë në koordinimin me vendimin e Bashkimit Evropian për të bllokuar transmetimet e mediave ruse, Sputnik dhe Russia Today, në të gjithë vendet anëtare të saj.
Bllokimi kishte ardhur pasi këto media konsideroheshin të kontrolluara nga Kremlini dhe të përfshira në veprime propagandistike kundër vendeve anëtare të BE-së dhe disa shteteve fqinje të Rusisë, duke manipuluar dhe shtrembëruar rëndë faktet (shih vendimin e Këshillit të Bashkimit Evropian).
Ursula von der Leyen, Presidente e Komisionit Evropian, kishte deklaruar se këto media nuk do të mund të përhapin më gënjeshtra për të justifikuar luftën ruse në Ukrainë. (shih këtu)
Këtë vendim ajo e arsyetonte duke e quajtur si mjet për të ndaluar dezinformatat toksike dhe të dëmshme ruse në Evropë.
Po ashtu edhe SHBA-të kishin marrë vendim për ndalimin e disa mediave ruse (këtu).
Zyrtarët e BE-së vazhdojnë ta mbajnë në fuqi këtë vendim, për aq kohë sa situata në terren, përkatësisht zhvillimet e luftimeve në Ukrainë, nuk kanë marrë ndonjë epilog.
Artikull nga Etrit Rexhepi
