Shkroi: Etrit Rexhepi
Publikohet një artikull i titulluar “Gjilanin e fiton LDK-ja në balotazh”.
Kjo përmbajtje me këtë titull është publikuar të dielën (14 shtator) nga një portal online me emrin “mediafokus.info”.
Çka nuk shkon me titullin?
Hibrid.info gjeti se pretendimi për fitoren e LDK-së në Gjilan paraqet një opinion, gjë e cila nuk bëhet e qartë në titull.
Në kreun e titulli shkruan se, “Sonte në Pressing po diskutohet për zgjedhjet lokale dhe gjasat e partive nëpër komuna.”
Ndërsa nga fjalia pasuese kuptohet se pretendimi në titull paraqet opinionin e Baton Haxhiut, njërit nga panelistët në studio në këtë diskutim.
Citatet e Haxhiut në artikull prej nga është marrë pretendimi i paraqitur:
“Podujeva i takon Ekrem Hysenit, por në balotazh. Te Prishtina abstenoj me thonë se kush shkon në balotazh, sepse votat dot ë jenë me 1 për qind, dallim për tre kandidat. Gjithashtu nuk besoj shumë se kujt do t’i shkojnë votat e të tretit të balotazhit, pasi që armiqësia mes tri partive, është e njëjtë.
Përparësitë e LDK janë: Istogu, Vitia, Lipjani: unë mendoj që Imri Ahmeti nuk e ka fare problem. Besnik Osmani në Fushë Kosovë, Ekremi në Podujevë, Gjilan në baltoazh do të ffitojë LDK, në Pejë gjithashtu dhe në Obiliq”.
Hibrid.info ka hulumtuar dhe ka gjetur videon e emisionit të publikuar në kanalin zyrtar të televizionit “T7”, ku transmetohet ky format televiziv dhe ka konfirmuar vërtetësinë e deklaratës së Baton Haxhiut, për të cilën është raportuar në artikullin e trajtuar (shih këtu, 01:23:36).
Zgjedhjet lokale në komunat e Kosovës, do të mbahen më 12 tetor të vitit 2025, ndërsa fushata politike ka nisur të shtunën (13 shtator), që do të thotë se ende nuk ka konfirmim zyrtar për rezultatet e zgjedhjeve në komuna (shih këtu).
Gjithashtu, hibrid.info përmes hulumtimit me anë të makinës së kërkimit “Google”, nuk ka gjetur asnjë sondazh kredibil të publikuar, që do të jipte një pasqyrë paraprake për rezultatin e kandidatëve për kryetarë komunash në Kosovë (shih këtu).
Analiza:
Titulli ka paraqitur opinionin e panelistit Baton Haxhiu për rezultatin e zgjedhjeve në komunën e Gjilanit, si fakt të konfirmuar.
Në titull nuk tregohet se bëhet fjalë për parashikim.
Andaj, bazuar në metodologjinë e punës, hibrid.info e vlerëson si “Clickbait”.
Arsyetimi:
“Clickbait” vlerësohen ato përmbajtje informative titulli i të cilave është përgjithësues dhe nuk bënë të ditur vendndodhjen e ngjarjes, kontekstin dhe relevancën. Tekste dhe artikuj të tillë synojnë të tërheqin vëmendjen e audiencës me tituj sensacionalë me pasojë çorientuese, që nuk e qartësojnë saktësisht përmbajtjen e artikullit. Titujt “clickbait” bëhen kryesisht për të tërhequr lexueshmëri në rastin e publikimeve mediatike dhe/ose për të fituar nga klikimet në rastet e publikimeve komerciale.