Shkroi: Fatbardh Dema
Pretendohet se kryeministri i Kosovës Albin Kurti dhe Prishtina zyrtare kanë manifestuar për dorasin nga Kosova, Faton Hajrizi, i cili dyshohet se vrau një zyrtar policor në Serbi.
Ky pretendim u bë nga Petar Petkoviq, drejtor i Zyrës për Kosovën në Qeverinë e Serbisë.
Çka shkroi Petkoviq në llogarinë e tij në X (ish-Twitter)?
Kështu e manifestojnë Prishtina dhe Kurti kriminelin dhe terroristin që vrau policin serb Nikola Krsmanoviq! Ata anulojnë ngjarjet zyrtare në shenjë zie dhe e nderojnë atë. Vrasësit e serbëve për të ashtuquajturën Kosovë janë heronj!
Vegëza e postimit të publikuar nga Petkoviq:
Petkoviq në këtë postim ka bashkëngjitur vegëzën e artikullit të publikuar nga portali në gjuhën serbe “Kosovo-Online.com”, i cili flet për njoftimin e kryetarit të Komunës së Skënderajt, Fadil Nura për anulimin e mbrëmjes muzikore (19 korrik) në kuadër të muajit “Ditët e Mërgatës”.
Nura kishte njoftuar për anulimin e kësaj mbrëmjeje si shenjë nderimi për familjen e qytetarit të Skënderajt që u vra me 19 korrik në Serbi. (këtu)
Çka nuk shkon me pretendimin e Petkoviqit?
Pas kontrollit të fakteve, hibrid.info ka vërtetuar se pretendimi i Petkoviqit nuk qëndron. Kjo për faktin se Nura nuk ka shpallë ditë zie për kosovarin e vrarë në Serbi, por ka anuluar mbrëmjen muzikore për nder të familjes së të vrarit dhe se i njëjti ishte qytetar i Skënderajt.
Gjithashtu, kryeministri Kurti, para se Hajrizi të vritej, kishte bërë thirrje që rasti të mos politizohej. (shih këtu)
“Autoritetet tona kompetente, Ministria e Punëve të Brendshme, Ministria e Punëve të Jashtme, Policia, do ta informojnë publikun për gjendjen aktuale se ku jemi dhe çfarë duhet bërë në të ardhmen. Edhe unë pres që të japin deklaratat e tyre profesionale, sepse ne besojmë se kjo çështje nuk duhet të politizohet, por të trajtohet si e tillë, nga pikëpamja e sigurisë, ligjore dhe profesionale”, ka thënë Kurti në një konferencë për media.
Ndërsa zëvendëskryeministri i Qeverisë së Kosovës, Besnik Bislimi, ka folur për rastin e arratisjes së Faton Hajrizit në Serbi. Ai është shprehur se Hajrizi në Kosovë është trajtuar si kriminel, jo siç ka bërë Serbia me Millan Radoiçiqin, që e ka marrë përgjegjësinë për sulmin në Banjskë në shtator të vitit të shkuar. (shih këtu)
Analiza:
Petkoviq ka pretenduar rrejshëm se Kurti e Prishtina zyrtare kanë anuluar ngjarje zyrtare në shenjë zie dhe nderim të qytetarit nga Kosova, që u vra dje (19 korrik) në Serbi nga policia e këtij shteti.
Pas kontrollit të fakteve, del se ky pretendim nuk qëndron. Ishte kryetari i Komunës së Skënderajt, Fadil Nura, i cili përmes një njoftimi ka bërë të ditur se si shenjë nderimi për familjen e të vrarit që ishte nga komuna e Skënderajt, është anuluar mbrëmja muzikore e paraparë të mbahej dje (19 korrik).
Bazuar në metodologjinë e punës, hibrid.info e vlerëson këtë pretendim të Petkoviqit si “Dezinformatë”.
Arsyetimi:
Vlerësimin si “Dezinformatë” e merr ajo përmbajtje informative e cila në vete përmban një “miks” të burimeve të pasakta apo edhe atribute gjysmë të vërteta, e që krijohet dhe/apo shpërndahet me qëllim të paramenduar për të shkaktuar dëm. Prapa motivit të prodhuesve/shpërndarësve të përmbajtjeve dezinformuese qëndron arritja e një qëllimi politik, financiar, psikologjik apo social.