Sipas të dhënave të publikuara nga Zyra Evropiane e Statistikave (Eurostat) më 17 qershor 2026, 29.2% e personave të moshës 16–74 vjeç në Bashkimin Evropian (BE), gjatë vitit 2025, u përpoqën të verifikonin vërtetësinë e informacionit ose përmbajtjes që kishin hasur në internet, duke përdorur burime të tjera (shih këtu).
Të dhënat janë publikuar në kuadër të statistikave për përdorimin e teknologjive digjitale.
Të dhënat tregojnë dallime ndërmjet vendeve të Bashkimit Evropian. Irlanda prin me përqindjen më të lartë të personave që janë përpjekur të verifikojnë informacionin online, me 63.6%. Pas saj renditet Holanda, me 53.1%, ndërsa Luksemburgu me 45.2%.
Në anën tjetër, Greqia regjistron përqindjen më të ulët, me 9.8%, e ndjekur nga Lituania me 14.9% dhe Rumania me 18.2%.
Edhe vendet e Ballkanit Perëndimor përfshihen në këtë statistikë. Sipas të dhënave të Eurostat-it, Maqedonia e Veriut ka përqindjen më të lartë në rajon, me 24.22% të personave që janë përpjekur të verifikojnë informacionin online. Pas saj renditet Mali i Zi, me 21.43%, Bosnjë-Hercegovina me 18.02%, Shqipëria me 14.34% dhe Serbia me 11.13%.
Këto rezultate tregojnë se të gjitha vendet e rajonit për të cilat ka të dhëna renditen nën mesataren e Bashkimit Evropian, prej 29.2%. Për Kosovën nuk ka të dhëna të publikuara për këtë tregues në vitin 2025.
Duhet theksuar se ky tregues mat përpjekjet e qytetarëve për të verifikuar informacionin përmes burimeve të tjera dhe nuk paraqet drejtpërdrejt aftësinë e tyre për të dalluar informacionin e saktë nga ai i pasaktë, apo nivelin e ekspozimit ndaj dezinformatave.
Në një mjedis digjital ku informacioni shpërndahet me shpejtësi, verifikimi përmes burimeve të tjera mbetet një prej praktikave të rëndësishme për konsumimin kritik të informacionit.