“Çmimet e ujit të ambalazhuar janë rritur deri në 40% në muajin e fundit”, mban përshkrimin një postim i publikuar më 10 prill në Facebook nga faqja zyrtare e portalit informativ “Kosovapost.net”.
Çka nuk shkon me këtë pretendim?
Pas verifikimit të fakteve të kryer online, hibrid.info ka vërtetuar se ky pretendim nuk ofron burim apo referencë.
Në postimin e publikuar nga faqja “Kosovapost.net” nuk paraqitet artikull që do të mbështeste pretendimin e bërë (shih këtu).
Hibrid.info ka kërkuar në ueb-faqen zyrtare të portalit Kosovapost.net, përmes funksionit “search” (kërko), duke përdorur titullin “Çmimet e ujit të ambalazhuar janë rritur deri në 40% në muajin e fundit”, por nuk është gjetur asnjë artikull i publikuar me këtë përmbajtje (shih këtu).
Pra, ky pretendim është publikuar vetëm si postim në faqen zyrtare të këtij mediumi në Facebook.
Edhe pas kërkimit në “Google”, nuk shfaqet një informacion i tillë i publikuar nga ndonjë burim kredibil. Krejt çka shfaqet pas këtij kërkimi është postimi i faqes “Kosovapost.net” në Facebook (shih këtu).
Për më tepër, në këtë postim nuk jepet asnjë informacion mbi burimin e të dhënave apo bazën e këtij pretendimi.
As “Indeksi i Harmonizuar i Çmimeve të Konsumit (IHÇK), Mars 2026”, i publikuar nga Agjencia e Statistikave të Kosovës, nuk tregon se ka pasur shtrenjtim të tillë (shih këtu).
Analiza:
Pretendimi se çmimet e ujit të ambalazhuar janë rritur deri në 40% gjatë muajit të fundit nuk mbështetet nga asnjë burim i verifikueshëm.
Ky informacion është publikuar vetëm si postim në Facebook nga portali informativ “KosovaPost.net”, pa u shoqëruar me artikull apo referencë, ndërsa kërkimet online nuk ofrojnë asnjë raportim nga burime kredibile që e konfirmon atë.
Bazuar në metodologjinë e punës, hibrid.info e vlerëson këtë postim si “përmbajtje e paverifikuar”.
Arsyetimi:
Vlerësimi “I pa verifikuar” u bëhet atyre përmbajtjeve informative që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur të verifikohen për shkak të rrethanave të caktuara (shpejtësisë, mungesës së burimeve) gjatë publikimit të përmbajtjes.