Shkroi: Festim Rizanaj
Më 1 mars, “TopChannel” në llogarinë e vet në Facebook publikoi një video ku shihej një ndërtesë duke u djegur. Video është publikuar me mbishkrimin:
“Situata në Dubai është përkeqësuar ndjeshëm gjatë orëve të fundit në një përshkallëzim të konfliktit në Lindjen e Mesme, ku forcat e Gardës Revolucionare të Iranit kanë lansuar një valë raketash dhe dronësh drejt vendeve të Gjirit Persik si hakmarrje për vrasjen e liderit suprem Ali Khamenei nga sulmet amerikano-izraelite. Këtë të diel një qiellgërvishtës në Dubai është përfshirë nga flakët pas sulmit nga një dron iranian”. (këtu)
Nëpërmjet videos pretendohet djegia e një ndërtese në Dubai pas sulmit nga një dron iranian.
Pas verifikimit të fakteve nga Hibrid.info, u konstatua se video nuk ka lidhje me luftën e fundit Izrael/SHBA-Iran.
Çfarë dihet lidhur me këtë video?
Pas sulmit të SHBA-së dhe Izraelit ndaj Iranit, i cili filloi më 28 shkurt, u raportua se Irani kishte shënjestruar bazat amerikane në Lindjen e Mesme. Një video e shpërndarë në mediat sociale dyshohej se tregonte momente nga një operacion në një ndërtesë në Dubai.
Megjithatë, rezultatet e kërkimit të imazheve tregojnë se videoja shfaq zjarrin që ndodhi më 1 tetor 2015, në një rezidencë në Rrugën King Faisal në Sharjah, Emiratet e Bashkuara Arabe. (këtu)
Ekzistojnë gjithashtu raportime lajmesh dhe video nga këndvështrime të ndryshme që lidhen me incidentin e datës 1 tetor 2015. (këtu)
Pra, video nuk është aktuale dhe nuk ka të bëjë me sulmet Izrael/SHBA – Iran.
Analiza:
Një video e publikuar nga “TopChannel” më 1 mars pretendon për një ndërtesë në Dubai që digjet pas sulmit nga një dron iranian si hakmarrje për sulmet amerikano-izraelite ndaj Iranit.
Megjithatë, videoja daton nga 1 tetori 2015 në një rezidencë në Rrugën King Faisal, Sharjah, Emiratet e Bashkuara Arabe, dhe nuk lidhet me sulmet e fundit SHBA-Izrael ndaj Iranit.
Bazuar në metodologjinë e punës, hibrid.info këtë pretendim e vlerëson si “përmbajtje e paverifikuar”.
Arsyetimi:
Vlerësimi “I pa verifikuar” u bëhet atyre përmbajtjeve informative që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur të verifikohen për shkak të rrethanave të caktuara (shpejtësisë, mungesës së burimeve) gjatë publikimit të përmbajtjes.
