Zyra për Kosovën në Qeverinë e Serbisë (ZKQS) raportoi se në Fushë Kosovë është thyer shtëpia e pensionistëve Jordan dhe Slobodanka Ristiq, duke pretenduar se kryerësit janë shqiptarë. Po ashtu, u pretendua se rasti ka motiv etnik.
Çka nuk shkon me këtë përmbajtje?
Pas verifikimit të fakteve nga hibrid.info, rezulton se në këtë pretendim nuk është paraqitur asnjë dëshmi apo fakt që vërteton se kryerësit e veprës janë shqiptarë.
Në raportimin e saj, ZKQS nuk ka ofruar prova që do të mbështesnin pretendimet për përkatësinë etnike apo motivin etnik të incidentit.
Njoftimi i ZKQS-së u publikua edhe nga ueb-faqja zyrtare e Qeverisë së Serbisë, e portalet në serbisht si “rts.rs”, “novosti.rs” e “kosovo-online.com”.
Pjesë nga raportimi i ZKQS-së, i përkthyer në shqip:
Në Fushë Kosovë, sot është thyer shtëpia e pensionistëve Jordan dhe Slobodanka Ristiq, një prej familjeve të pakta serbe që kanë mbetur të jetojnë në këtë qytet. Bëhet fjalë për një incident të ri të motivuar etnikisht nga shqiptarët, ndërsa pothuajse nuk kalon ditë pa u shënuar ndonjë sulm i ri ndaj serbëve, veçanërisht në jug të lumit Ibër.
Pavarësisht presionit, familja Ristiq nuk u largua nga Fushë Kosova dhe as nuk e shiti pronën e saj, por qëndroi të jetonte këtu e rrethuar nga shqiptarë.
Kur sot u kthyen në shtëpinë e tyre nga vizita te vajza, e gjetën banesën të plaçkitur dhe të përmbysur, nga e cila ishin marrë gjërat e shtëpisë, televizori, madje edhe rubinetat ishin nxjerrë nga muri.
Fakti që sulme të tilla mbeten të pazbardhura dhe të pandëshkuara vetëm nxit incidente dhe ekstremistë të rinj, duke treguar se nuk ekziston një synim i vërtetë i Prishtinës për ndërtimin e një bashkëjetese të qëndrueshme.
Edhe pse në këtë raportim nuk thuhet nëse rasti është paraqitur në polici, hibrid.info ka kontrolluar raportin 24-orësh të Policisë së Kosovës për të verifikuar nëse ngjarja është raportuar zyrtarisht.
Megjithatë, në raportin e publikuar më 6 maj, që përfshin ngjarjet e 5 majit (ditën kur rasti u raportua nga ZKQS), nuk figuron një rast i tillë (shih fotografinë më poshtë).
Analiza
U raportua se në Fushë Kosovë është thyer shtëpia e një familjeje serbe, duke pretenduar pa fakte se kryerësit janë shqiptarë dhe se rasti ka motiv etnik.
Pas verifikimit të fakteve, u vërtetua se në raportim nuk janë ofruar dëshmi për këto pretendime, ndërsa rasti nuk figuron as në raportin 24-orësh të Policisë së Kosovës për datën kur është raportuar ngjarja.
Bazuar në metodologjinë e punës, hibrid.info e vlerëson këtë përmbajtje si “teori konspirative”.
Arsyetimi
Vlerësim si “Teori konspirative” marrin ato përmbajtje informative të cilat në vete përmbajnë një përshkrim të rremë ose të paverifikueshëm të një dukurie, ngjarje ose një personi, duke e paraqitur atë si pjesë ose rezultat të një plani të fshehtë (“komplot”). Karakteristikë e këtyre përmbajtje është se ato paraqesin një seri pretendimesh, të paraqitura si fakte, midis të cilave vendosen marrëdhënie shkak-pasojë, pa ofruar ndonjë provë të besueshme.