“Donikë Gërvalla presidente e ardhshme e Kosovës?!” mban titullin një artikull i publikuar nga mediumi “botasot.info” më 17 korrik.
Artikulli përmban një imazh në të cilin shfaqet Gërvalla dhe anash saj edhe shkrimi “Presidenca e Kosovës”.
Çka nuk shkon me titullin?
Përderisa titulli përgjithësues lë hapësirë të interpretohet nëse kjo çështje është ngritur edhe në instanca të larta vendimmarrëse për këtë proces, artikulli tregon se emri i Gërvallës është përmendur nga një publicist.
Kreu i artikullit:
“Publicisti Idriz Zeqiraj vlerëson se zëvendëskryeministrja dhe ministrja e Punëve të Jashtme, Donikë Gërvalla, do të ishte një zgjedhje e denjë për postin e Presidentes së Republikës së Kosovës”.
Përdorimi i pikëpyetjes dhe pikëçuditjes në fund
Në fund të titullit janë përdorur pikëpyetja dhe pikëçuditja. Në titullin që po trajtohet, kombinohet pyetja me habinë, mosbesimin, ironinë apo indinjatën. Në teori, diçka e tillë njihet si formë e “interrobang” si diçka që synon të kombinojë emocionet, mosbesimin dhe hutimin në formën e një pyetjeje (shih këtu).
Mospërmendja e emrit të deklaruesit në titull se “Gërvalla do të ishte zgjedhje e denjë për presidente” dhe imazhi ilustrues, mund të nxisin keqinterpretime nëse një çështje e tillë është ngritur në instanca vendimmarrëse në këtë aspekt apo është thjesht një opinion i dikujt. Kjo vërtetohet nga disa komente në postimin e “Bota Sot” në Facebook.
Titulli i njëjtë është përdorur edhe nga faqe të tjera në Facebook, që i kanë shtuar edhe fjalën “Ekskluzive”, për ta paraqitur në formë më sensacionale (shih këtu, këtu dhe këtu).
Hibrid.info ka trajtuar në disa raste tituj që opinionet i paraqesin si lajm (shih këtu, këtu dhe këtu).
Konteksti për postin e presidentit
Për shkak të dështimit të zgjedhjes së presidentit brenda afateve kushtetuese, Kosova iu nënshtrua zgjedhjeve të reja parlamentare më 7 qershor.
Pas certifikimit të rezultateve kanë nisur afatet kushtetuese për konstituimin e Kuvendit dhe zgjedhjen e përbërjeve të reja të institucioneve – Qeverisë e presidentit.
Sipas Kushtetutës, seanca konstituive duhet të mbahet brenda 30 ditësh nga dita e shpalljes zyrtare të rezultateve të zgjedhjeve (neni 66). Rezultatet u certifikuan më 8 korrik.
Në Kushtetutë theksohet se Kuvendi mund të shpërndahet nëse brenda afatit prej 60 ditësh nga dita e fillimit të procedurës së zgjedhjes, nuk zgjidhet presidenti i Republikës (neni 82.3).
Si zgjidhet presidenti?
Presidenti si kreu i shtetit zgjidhet nga Kuvendi me votim të fshehtë (neni 86).
Për t’u nominuar si kandidat duhen nënshkrimet e të paktën 30 deputetëve, të cilët kanë të drejtë të nënshkruajnë vetëm, për një kandidat.
Zgjedhja bëhet me dy të tretat e votave të të gjithë deputetëve. Nëse në dy rundet e para asnjëri kandidat s’i merr 2/3 e votave organizohet rundi i tretë mes dy kandidatëve më të votuar në votimin e dytë dhe kandidati më i votuar që merr shumicën e votave të të gjithë deputetëve (61) zgjidhet president.
Deri tash emri i Gërvallës nuk është përmendur në ndonjë raportim kredibil si emër i propozuar për president (shih këtu).
Analiza:
Titulli “Donikë Gërvalla presidente e ardhshme e Kosovës?!” paraqet si mundësi reale një pretendim që bazohet vetëm në vlerësimin e një publicisti.
Artikulli nuk sqaron në titull se bëhet fjalë për deklaratë të një publicisti, duke lënë hapësirë për keqinterpretim se emri i Gërvallës është propozuar në instanca zyrtare për këtë pozitë.
Keqinterpretimi konfirmohet edhe nga disa komentues në media sociale.
Bazuar në metodologjinë e punës, Hibrid.info e vlerëson titullin e formuluar në këtë mënyrë si “Clickbait”.
Arsyetimi:
“Clickbait” vlerësohen ato përmbajtje informative titulli i të cilave është përgjithësues dhe nuk bën të ditur vendndodhjen e ngjarjes, kontekstin dhe relevancën. Tekste dhe artikuj të tillë synojnë të tërheqin vëmendjen e audiencës me tituj sensacionalë me pasojë çorientuese, që nuk e qartësojnë saktësisht përmbajtjen e artikullit. Titujt “clickbait” bëhen kryesisht për të tërhequr lexueshmëri në rastin e publikimeve mediatike dhe/ose për të fituar nga klikimet në rastet e publikimeve komerciale.