Një video e rreme është publikuar më 14 të këtij muaji (korrik) në rrjetin social “Facebook” përmes së cilës pretendohet se kryetari i Lidhjes Demokratike të Kosovës (LDK), Isa Mustafa, ka vdekur nga infektimi me virusin COVID-19.
Në këtë video me përshkrimin “Orët e fundit te Isë Mustafës (ngushllime Familjes)” janë kombinuar edhe deklaratat e zyrtarëve të LDK-së të bëra gjatë homazheve pranë varrit të ish presidentit të Kosovës, Ibrahim Rugova, gjatë përvjetorit të vdekjes.
Video e rreme:
Reagimi:
Një video e tillë menjëherë është përgënjeshtruar nga zyrtar të LDK-së.
Zëdhënësja e Lidhjes Demokratike të Kosovës, Gentiana Azemi ka bërë të ditur për mediat vendit se rasti videos se rremë është paraqitur në polici nga ana e partisë.
“Sekretari z. Abrashi e ka paraqitur rastin në fjalë në Polici, saktësisht Departamenti për Krime Kibernetike dhe ata janë duke u marrë me këtë çështje. Po ashtu ne konsiderojmë që këto janë veprime të ulta dhe LDK-ja e dënon ashpër këtë fushatë e cila po zhvillohet nëpër rrjetet sociale me qëllim të denigrimit të personave kryesor në LDK, në këtë rast ndaj kryetarit Mustafa”, ka thënë Azemi.
Ndërsa për këtë kanë reaguar edhe Policia e Kosovës (PK), ku në bashkëpunim me Prokurorinë, kanë ndërmarrë masat e nevojshme hetimore për videot me përmbajtje të rreme.
“Referuar kërkesës suaj, ju informojmë se Policia e Kosovës në këtë rast Sektori për Hetime të Krimeve Kibernetike në koordinim me Prokurorinë, ka ndërmarrë veprimet e nevojshme hetimore për trajtimin e rastit”, thuhet në përgjigjen e PK-së, dhënë për mediat në vend.
“Ju informojmë se Policia e Kosovës, përkatësisht Sektori për Hetime të Krimeve Kibernetike është duke e trajtuar rastin në bashkëpunim me Prokurorin e Shtetit dhe Kompaninë që ofron shërbimet e internetit. Varësisht nga të gjeturat do të ndërmerren edhe masat e nevojshme në bashkëpunim me Prokurorin e Shtetit”.
Verifikimi:
Hibrid.info e ka kategorizuar këtë publikim në rrjete sociale si Manipulim i Fakteve, Clickbait dhe Dezinformatë.
