Mediumi në gjuhën serbe “KosovoOnline.com” ka publikuar një artikull me titull “Vranica: Që nga 1 janari, 10,000 punëtorë në industrinë e hotelerisë janë larguar nga Kosova”.
Gjithashtu, edhe në kreun e artikullit, mediumi në gjuhën serbe pretendon se përfaqësuesi i Shoqatës së Gastronomëve të Kosovës, Arian Vranica ka thënë se nga data 1 janar, nga Kosova janë larguar 10 mijë punëtorë të sektorit të gastronomisë.
Pas verifikimit të fakteve të kryer nga hibrid.info, është vërtetuar se pretendimi i bërë nga ana e mediumit në gjuhën serbe, është i pasaktë.
Vegëza e artikullit të publikuar në portalin “KosovoOnline.com”:
Pjesë nga artikulli i publikuar në mediumin në gjuhën serbe “KosovoOnline.com”, i përkthyer në shqip:
Vranica: Që nga 1 janari, 10,000 punëtorë në industrinë e hotelerisë janë larguar nga Kosova
Përfaqësuesi i Shoqatës së Gastronomëve të Kosovës, Arian Vranica, tha se që nga hyrja në fuqi e vendimit për liberalizimin e vizave më 1 janar, nga Kosova janë larguar 10 mijë punëtorë të atij sektori, shumë prej të cilëve kanë kërkuar pushim pa pagesë.
Pas hulumtimit të kryer përmes makinave online të kërkimit, hibrid.info ka arritur të gjejë intervistën e përfaqësuesit të Shoqatës së Gastronomëve të Kosovës, Arian Vranica, dhënë për mediumin Klan Kosova. (shih këtu)
Vranica, sipas statistikave që thotë se i ka nga tereni, është shprehur se ka braktisje të punës pas liberalizimit të vizave, e që sipas tij deri në 10 mijë persona e kanë liruar vendin e punës.
I pyetur nga gazetaret se kjo shifër a ka të bëjë vetëm me personat e punësuar në sektorin e gastronomisë, Vranica u shpreh se “jo, unë po flas në përgjithësi”.
Pra, shifra prej 10 mijë punëtorë të larguar nga Kosova, sipas Vranicës nuk janë vetëm nga sektori i gastronomisë, siç pretendon mediumi në gjuhën serbe. (shih këtu videon nga minuta 5:19)
Analiza:
Një medium në gjuhën serbe ka pretenduar pa saktë se përfaqësuesi i Shoqatës së Gastronomëve të Kosovës, Arian Vranica ka thënë se nga data 1 janar, nga Kosova janë larguar 10 mijë punëtorë të sektorit të gastronomisë.
Pas verifikimit të fakteve të kryer nga hibrid.info, është vërtetuar se Vranica në këtë shifër nuk i ka përfshirë vetëm punëtorët e sektorit të gastronomisë, por në përgjithësi punëtorët edhe të sektorëve të tjera që janë në marrëdhënie pune.
Bazuar në metodologjinë e punës, hibrid.info e vlerëson artikullin e “KosovoOnline.com” si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.