Shkroi: Etrit Rexhepi
Publikohet një fotografi ku shihet Dimal Basha, kryetari i Kuvendit të Republikës së Kosovës, me mbishkrimin që paraqet deklaratën e tij: “Nuk e kam pas fokusin te shkolla”.
Fotografia është postuar të hënën (1 shtator) në faqen e portalit “Periskopi.com” në Facebook dhe ka përshkrimin “Urime 1 shtatori!”.
Çka nuk shkon me këtë përmbajtje?
Megjithëse në koment është vendosur videoja me deklaratën e plotë të kryetarit Basha, këtij publikimi i mungon sqarimi për kohën kur ajo është dhënë.
Hibrid.info ka gjetur se fotografia me deklaratën e Bashës si mbishkrim, është shkëputur nga fjalimi i parë i tij si kryetar i Kuvendit të Kosovës (shih këtu).
Ndërsa, videoja e deklaratës së plotë të Bashës, është shkëputur nga një intervistë e tij në emisionin “Podcast me Shkelzen Dakaj”. Në kanalin zyrtar të mediumit “Gazeta Infokus” në Youtube, rezulton se videoja është publikuar aty më 19 janar 2024 (shih këtu). Deklarata e cila është paraqitur në fotografinë e publikuar nga mediumi në fjalë, në video mund të gjendet në minutën 41:06.
Kjo nënkupton se kjo deklaratë e Bashës është bërë më herët, por se në publikimin e mediumit “Periskopi” nuk bëhet e ditur një gjë e tillë.
Hibrid.info gjeti se kryetari Basha gjatë ditës ka uruar 1 shtatorin, fillimin e vitit të ri shkollor, me anë të një postimi në llogarinë e tij në Facebook (shih këtu).
Analiza:
Deklarata e kryetarit të Kuvendit të Kosovës, Dimal Basha: “Nuk e kam pas fokusin te shkolla”, është deklaratë e bërë në fillim të vitit të kaluar, përkatësisht më 19 janar 2024.
Në publikimin e portalit “Periskopi”, ku paraqitet kjo deklaratë, nuk bëhet e ditur koha se kur është thënë ajo.
Bazuar në metodologjinë e punës, hibrid.info e vlerëson deklaratën si “Clickbait”.
Arsyetimi:
“Clickbait” vlerësohen ato përmbajtje informative titulli i të cilave është përgjithësues dhe nuk bënë të ditur vendndodhjen e ngjarjes, kontekstin dhe relevancën. Tekste dhe artikuj të tillë synojnë të tërheqin vëmendjen e audiencës me tituj sensacionalë me pasojë çorientuese, që nuk e qartësojnë saktësisht përmbajtjen e artikullit. Titujt “clickbait” bëhen kryesisht për të tërhequr lexueshmëri në rastin e publikimeve mediatike dhe/ose për të fituar nga klikimet në rastet e publikimeve komerciale.