Deklaratat e shefit të Zyrës për Kosovën në Qeverinë e Serbisë, Petar Petkoviq se kryeministri i Kosovës, Albin Kurti, nuk është për dialog por qëllimi i tij është vetëm konflikti, ka zënë vend në mediat në gjuhën serbe sot.
Petkoviq, deklaratën e Kurtit se “nuk mund të përjashtojë konfliktet në rajon” e interpreton si synim të tijin për t’i vënë flakën Ballkanit Perëndimor, duke shkaktuar kriza dhe tensione në veri të Kosovës. Shefi i zyrës, pretendon se qëllimi i Kurtit, nëpërmjet ndërtimit të bazave policore është që t’i mbyllë serbët në veri në një rreth, e që sipas Petkoviq, nuk do t’ia arrij.
Vegëza e artikullit të publikuara në “Novosti”:
Pjesë të artikullit të publikuar në “Novosti”:
Fakti që Albin Kurti “nuk mund të përjashtojë konfliktet në rajon” flet vetëm për synimin e tij për t’i vënë flakën Ballkanit Perëndimor duke shkaktuar tensione dhe kriza në Kosovë dhe Metohi, ka vlerësuar sot drejtori i Zyrës për Kosovë dhe Metohi, dr. Petar Petkoviq.
Askush të mos gënjehet se qëllimi i Prishtinës në ato lëvizje të njëanshme është fisnik dhe humanitar, qëllimi i vërtetë është përpjekja e Kurtit për të rrethuar serbët në veri të krahinës, gjë që nuk do t’ia dalë”, tha drejtori i Zyrës për Kosovën dhe Metohija.
Deklarata e Petkoviqit u publikua në mediat kryesore në gjuhën serbe, me tituj që është përdorur deklarata e Petkoviqit, ku thotë se “Kurti ka vetëm konfliktin në kokë, e jo dialogun”. (këtu, këtu dhe këtu)
Pretendimet e shefit të zyrës për Kosovën në lidhje me Kurtin se gjoja po mendon vetëm për konflikt, e jo dialog, janë të pabaza duke qenë se nuk ofrojnë ndonjë fakt konkret mbështetës. Pretendimi se ndërtimi i bazave për pozicionim të njësisë special të Policisë së Kosovës ka për qëllim rrethimin e serbëve është i pabazë për shkak se një veprim i tillë është marrë për shtrirjen e sundimit të ligjit dhe ruajtjen e integritetit territorial. Këtë e ka konfirmuar edhe ministri i Punëve të Brendshme – Xhelal Sveçla, në emisionin DPD te Fidan Jupolli në T7 më 9 shtator.
Kurti në intervistën dhënë për mediumin kroat ‘Veçernji list” ofron fakte se pse nuk e përjashton mundësinë e një konflikti në Ballkanin Perëndimor. Kurti deklaratën e tij ndërlidh me faktin se në anën serbe të kufirit ndërmjet Kosovës dhe Serbisë ka rreth 48 baza operative sulmuese progresive, prej të cilave 28 janë ushtarake dhe 20 i përkasin xhandarmërisë. Për më tepër, Kurti thekson se vitin e kaluar Serbia dhe Rusia kanë pasur 104 stërvitje dhe aktivitete të përbashkëta ushtarake dhe kanë planifikuar 91 dhe këtë e interpreton si përgatitje për luftë nga ana e serbëve. (këtu)
Analiza:
Shefi i zyrës për Kosovën, Petar Petkoviq, sot ka deklaruar se kryeministri i Kosovës, Albin Kurti, në kokën e tij ka konfliktin dhe jo dialogun. Ky interpretim i Petkvoqit vjen si interpretim i pabazë i deklaratës së Kurtit, për median kroate ku thotë se nuk përjashtohet mundësia e një konflikti.
Kurti deklaratën e tij e mbështet në fakte konkrete të lëvizjeve të bëra nga ushtria serbe në anën serbe të kufirit Kosovë-Serbi, e që do të ishin shkaktar të një konflikti të mundshëm. Kurti paralajmëron një konflikt të mundshëm në bazë të lëvizjeve ushtarake të shtetit serb në kufi me Kosovë, e jo të ndonjë plani personal për shkaktuar trazira në Ballkan.
Në bazë të metodologjisë së punës, hibrid.info vlerëson se këto interpretim të bëra nga Petkoviq janë të aluduar dhe klasifikohen si “manipulim i fakteve”.
Vlerësimi:
Vlerësimin si “Manipulim i fakteve” marrin ato raportime mediatike që përdorin fakte të njohura si të sakta, por i interpretojnë ato në mënyrë të shtrembëruara. Këto raporte zakonisht përdorin informacion të saktë për të nxjerrë përfundime ose pretendime të pasakta, duke drejtuar kështu përfundimet e konsumatorëve të përmbajtjes së mediave në drejtim të gabuar në lidhje me kuptimin aktual të fakteve të paraqitura.
