Artikulli me titull “U kapën miliarda euro kokainë në Kosovë, vjen deklarimi i ambasadës amerikane në Prishtinë” është publikuar nga portali “veriu.info”.
Hibrid.info përmes verifikimit të fakteve ka vërejtur se titulli i këtij artikullit është i shkruar gabim, pasi nuk bëhet fjalë për miliarda euro, por për vlerë milionëshë të kokainës të konfiskuar në Lipjan.
Për këtë ngjarje ka folur edhe kryeprokurori i shtetit Aleksandër Lumezi, i cili ka njoftuar se vlera e kokainës së konfiskuar kap shifrën rreth 20 milionë euro.
Pjesë nga teksti i artikullit të publikuar në portalin “veriu.info”:
Katërqind kilogramë kokainë u kapën në një konteiner me mish që vinte nga Brazili. Ndërkohë kokaina ishte futur në disa pako kartoni, ndërsa ambalazhi dyshohet të jetë i ngjashëm me paketimin e mishit për tu kamofluar.
Lidhur me këtë rast, kryeprokurori i Shtetit, Aleksandër Lumezi, në një konferencë për media bëri të ditur se vlera e kokainës së konfiskuar kap shifrën rreth 20 milionë euro.
“Policia e Kosovës, në bashkëpunim të ngushtë me policinë, autoritet italiane dhe auto amerikane. Janë konfiskuar 400 kg kokainë vlera e të cilave arrinë rreth 20 milionë euro. Po ashtu janë konfiskuar disa makina dhe mjete tjera. Gjatë hetimit janë përdorur masa të fshehta duke shikuar lëvizjen e të dyshuarve nga Italia deri në vendin tonë”, ka deklaruar Lumezi.
Vegëza e artikullit të publikuar në portalin “veriu.info”:
Analiza:
Ky artikull i publikuar nga portali “veriu.info”, përmban titull të gabuar, që nuk përputhen me deklaratën e kryeprokurorit të shtetit, Aleksandër Lumezi, e cila është parafrazuar dhe cituar në përmbajtje.
Pas verifikimit nga hibrid.info, del se titulli i artikullit është i shkruar gabim, por pa qëllimin e qartë të dezinformimit të publikut. Ky artikull vlerësohet si “Gabim”.
Arsyetimi:
Gabim – Vlerësimin “Gabim” e marrin raportet në media në të cilat redaksia e mediave bënë një gabim duke publikuar informacion të pasaktë ose duke transmetuar lajme të pavërtetuara nga një burim tjetër, pa qëllimin e qartë të dezinformimit të publikut.