Gazeta e përditshme italiane Libero, ka publikuar një lajm të një gruaje nga qyteti Lampeduza e quajtur “zonja Rozi”, e cila thotë se emigrantët myslimanë kanë vjedhur dhe pjekur në zjarr katër qentë e saj, si dhe pula e kafshë tjera shtëpiake, përveç derrave.
Artikulli i plotë i botuar në gazetën Libero
Ekspertë në mediumin italian “Open”, i cili merret me zbërthimin e lajmeve të rreme, konfirmuan se ky lajm është i pa vërtetë.
Kryetari i Lampeduzës, Toto Martello, tha se gruaja në fjalë, përmes pretendimeve të saj, ka hedhur njollë mbi Lampeduzën dhe ky lajm shërben vetëm për të përhapur urrejtje ndaj emigrantëve.
“Ky është manipulim i situatës, ajo hedh njollë mbi Lampeduzën dhe të gjithë qytetarët e saj, dhe shërben vetëm për të përhapur urrejtje ndaj emigrantëve”, u shpreh Martello.
Antropologë dhe shkencëtarë të forenzikës morën pjesë në këtë hetim dhe ekspozim të lajmit të rremë, të cilët thanë se nëse qentë do të ishin të djegur, eshtrat e tyre nuk do të kishin ngjyrë të bardhë.
Historiani i teologjisë, Davide Suleyman Amore, tha se feja islame e ka të ndaluar konsumimin e mishit të kafshëve grabitqare mishngrënëse, përfshirë edhe qentë.
Gjatë këtij hetimi u vërtetua se zonja në fjalë ka publikuar lajme të rreme edhe në vitin 2018 dhe si rezultat i kësaj, Twitter ka mbyllur llogarinë e saj.