Disa media online kanë publikuar një artikull në të cilin pretendohet se Izraeli ka ushtrinë më të fortë në rajonin e Lindjes së Mesme, duke lënë prapa edhe shtetin e Turqisë.
Lajmi i këtij artikulli është i vjetër, i publikuar nga mediumi “Izraelisot.com”, në vitin 2014. Edhe përkundër faktit se lajmi është i vjetër, edhe në titullin e artikullit autentik, nuk përmendet se ushtria e Izraelit lë prapa ata të Turqisë, siç pretendohet në titullin e artikullit të publikuar sot (16 maj 2021) nga disa media kosovare. Lajmi i “Izraelisot.com” i është referuar ekspertëve amerikanë Patrik Megahan dhe Kris Harmer, të cilët shprehen se forcat mbrojtëse izraelite kanë më shumë cilësi se ushtritë e tjera vendeve të rajonit.
Gjithashtu, ky artikull i mediave që pretendojnë ta paraqesin si aktual, i referohet edhe raportit të publikuar në “Business Insider”, ku shkruan se Izraeli ka një avantazh të dukshëm në rajon, i cili vjen në sajë të marrëdhënieve të ngushta me SHBA-në dhe investimeve në industrinë e saj mbrojtëse, ku përfshihen asetet hapësinore, avionë shumë të avancuar luftarakë, dronë dhe armë bërthamore.
Hibrid.info pas verifikimit të fakteve në ranglistën e “Business Insider”, ka gjetur se Izraeli sikurse në vitin 2014, kur është publikuar artikulli, por edhe tash nuk gjendet para shtetit të Turqisë sa i përket forcës ushtarake. Ndërsa në rangimin e 2021, kjo forcë ushtarake nuk e kalon për nga niveli as atë të Egjiptit, shtet ky fqinjë dhe në kufi me vet Izraelin.
Vegëza e artikullit të publikuar sot në disa media kosovare:
Business Insider: Izraeli ka ushtrinë më të fuqishme në Lindjen e Mesme, lë prapa edhe Turqinë
Në ranglistën e publikuar nga “Business Insider”, kuptohet se Turqia në vitin 2014 renditej si e 8-ta në botë, ndërsa aktualisht zë vendin e 10-të në renditjen e ushtrive botërore, përderisa ajo e Izraelit renditet e 14-ta në vitin 2021, ndërsa në vitin 2014 zinte vendin e 11-të (këtu). Aktualisht, para ushtrisë së Izraelit gjendet edhe ajo e Egjiptit (12), vend fqinjë dhe në kufi me shtetin hebre.
Ranglista e forcave ushtarake e publikuar në “BusinessInsider” në vitin 2021:
Edhe në uebfaqen e specializuar për çështje të mbrojtjes – “globalfirepower.com”, ushtria izraelite renditet prapa asaj të Turqisë dhe Egjiptit, në vendin e 20-të në botë.
Analiza:
Portalet kosovare, në artikullin e publikuar, kanë përdorur një lajm të vjetër, i cili si rrjedhojë përmbanë edhe informata të pa azhurnuara. Gjithashtu, në këtë artikull është vendosur titull i paqëndrueshëm sa i përket ushtrisë izraelite që gjoja është më e fortë se ajo turke. Por, në artikull asnjëherë nuk përmendet një gjë e tillë.
Edhe në referencën e mbështetur “Business Insider”, nuk gjendet një gjë e tillë siç pretendohet në titull, pasi ushtria izraelite qëndron më poshtë se ajo turke.
Pas analizës së kontrollit të fakteve bazuar në metodologjinë e punës, hibrid.info e vlerëson këtë artikull si “dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.
