Shkroi: Etrit Rexhepi
Janë publikuar përmbajtje me mbishkrimin që pretendojnë se ish-deputeti i Lidhjes Demokratike të Kosovës (LDK), Arben Gashi, ka deklaruar se Ramush Haradinaj, kryetar i Aleancës për Ardhmërinë e Kosovës (AAK) ka nisur mbledhjen e nënshkrimeve për kandidaturën për president të shtetit.
Përmbajtjet janë publikuar të enjten (29 janar) nga faqet në Facebook e tw mediave “Zeri” dhe “Mitropol” si dhe nga faqet “TandemPress”, “Shprehu 02” dhe “Prishtina Ime”.
Cila është e vërteta?
Hibrid.info gjeti se në këto përmbajtje deklarata e Gashit është keqinterpretuar.
Hibrid.info ka vërejtur se në të gjitha këto postime është theksuar se Gashi këtë deklaratë e ka dhënë në një intervistë për televizionin “ATV”.
Pas hulumtimit është gjetur një video-material i shkëputur nga kjo intervistë dhe i publikuar në faqen në Facebook të këtij medium, me mbishkrimin “Ramush Haradinaj po i mbledh nënshkrimet për President” (shih këtu).
Sipas asaj që shihet dhe dëgjohet në video, Gashi ka thënë: “Ka pasë ide me sa kam pa që Ramush Haradinaj me i mbledh nënshkrimet nga deputetët individualisht apo nga grupet politike, por nuk e di a është konkretizu”.
Kjo nënkupton se në bazë të deklaratës së Gashit, mbledhja e nënshkrimeve të deputetëve nga Ramush Haradinaj për kandidaturën presidenciale është përmendur si opsion, por nuk dihet nëse është zbatuar.
Ndërkohë, në përmbajtjet e trajtuara, ideja e përmendur nga Gashi për mbledhjen e nënshkrimeve nga Haradinaj është paraqitur në mënyrë të pasaktë si fakt i kryer.
Hibrid.info ka hasur në deklarata të disa akterëve të AAK-së, të cilët e kanë dhënë si ide që Haradinaj të jetë president, por nuk dihet nëse Gashi u është referuar këtyre deklaratave (shih këtu dhe këtu).
Zgjedhjet e parakohshme parlamentare u mbajtën më 28 dhjetor 2025. Rezultatet e këtyre zgjedhjeve ende nuk janë certifikuar. Sipas Ligjit për Zgjedhjet e Përgjithshme, Komisioni Qendror i Zgjedhjeve certifikon rezultatet përfundimtare të zgjedhjeve, pas përfundimit të të gjitha procedurave në vendvotime dhe qendrat e numërimit si dhe pasi organet përkatëse t’i shqyrtojnë të gjitha ankesat potenciale për procesin (shih këtu). Ndërsa në bazë të Kushtetutës së Kosovës, mandati i deputetit të Kuvendit të Kosovës fillon në ditën e certifikimit të rezultatit të zgjedhjes (shih këtu).
Në nenin 86 të Kushtetutës së Kosovës theksohet se secili shtetas mund të nominohet si kandidat për president nëse i siguron nënshkrimet e të paktën 30 deputetëve të Kuvendit. Deputetët e Kuvendit mund të nënshkruajnë vetëm për një kandidat për president.
Analiza:
Në disa përmbajtje pretendohet se ish-deputeti Arben Gashi ka deklaruar se Ramush Haradinaj po i mbledh nënshkrimet për kandidaturën presidenciale.
Por në të vërtetë, Gashi deklaroi vetëm se kjo ishte një ide që kishte dëgjuar, pa ditur nëse është realizuar.
Bazuar në metodologjinë e punës, hibrid.info i vlerëson këto përmbajtje si “Manipulim i fakteve”.
Arsyetimi:
Vlerësimin si “Manipulim i fakteve” marrin ato përmbajtje informative që përdorin fakte të njohura si të sakta, por i interpretojnë ato në mënyrë të shtrembëruara. Këto raporte zakonisht përdorin informacion të saktë për të nxjerrë përfundime ose pretendime të pasakta, duke drejtuar kështu përfundimet e konsumatorëve të përmbajtjes së mediave në drejtim të gabuar në lidhje me kuptimin aktual të fakteve të paraqitura.