Kryetari i Komisionit për Kosovën në Kuvendin e Serbisë, Milovan Drecun, ka dhënë një deklaratë për median serbe “RTV Pink”, ka përcjellur “Kosovo-online.com” (këtu) duke pretenduar se autoritetet e Kosovës po synojnë realizimin e një plani për spastrim etnik ndaj serbëve dhe bashkim me Shqipërinë.
Këtë pretendim Drecun thotë se bazon në një deklarate të ish-udhëheqëses së Kosovës për dialog teknik me Serbinë, Edita Tahirit, dhënë për mediumin në gjuhën serbe “Kosovo-Online.com” të dielën (2 janar), ku ka thënë se “serbët e zhvendosur nga qytetet e Kosovës, mund të kthehen pas një marrëveshje përfundimtare Kosovo-Serbi”.
Duke e keqinterpretuar deklaratën e Tahiri, Drecun thotë se kjo ide është pjesë e një plani strategjik të Prishtinës që të krijojë një “Kosovë etnikisht të pastër me shqiptarë dhe bashkimin e saj me Shqipërinë”.
Vegëza e intervistës së Milovan Drecun:
Mirëpo, pas kontrollit të intervistës së Tahirit, hibrid.info shihet se Tahiri nuk ka përmendur asnjëherë Kosovë etnikisht të pastër dhe nuk ka përmendur bashkim me Shqipërinë. Në fakt Tahiri, si një ish-zyrtare përgjegjëse për dialog me Serbinë, vetëm ka aluduar se serbët e shpërngulur nga qytetet e Kosovës pas përfundimit të luftës në Kosovë në vitin 1999, do të mund të ktheheshin pas arritjes së një marrëveshje përfundimtare Kosovë-Serbi.
Ndërsa Tahiri nuk ka thënë se moskthimi i serbëve në qytetet e Kosovës, është pjesë e një strategjie për ta bërë Kosovën etnikisht të pastër dhe bashkim me Shqipërinë, siç pretendon Drecun.
Vegëza e intervistës së Edita Tahirit:
Bashkimi i Kosovës me Shqipërinë, sipas Drecun, është pjesë e një strategjie të shqiptarëve. Mirëpo ky zyrtar serb, pretendimin e tij për ekzistimin e ndonjë strategjie, nuk e mbështetë me ndonjë fakt, përveç deklaratave të kryeministrit të Kosovës, Albin Kurti dhe atij të Shqipërisë, Edi Rama, se do të ishin pro bashkimit.
“Ajo çka është më shqetësuese shfaqë hapur qëllimin për bashkim me Shqipërinë. Për këtë ka folur edhe kryeministri i Shqipërisë, Edi Rama, por edhe disa ministria në të ashtuquajturën Qeveri në Prishtinë. Dhe ata me të vërtetë punojnë hapur në këtë”, tha Drecun.
Mirëpo, dy kryeministrat Kurti e Rama nuk kanë thënë se ka ndonjë strategji për bashkim.
Përkundrazi, të dy liderët e kanë quajtur këtë si një hipotezë dhe një veprim historik, për të cilin nuk do të mund caktohet ndonjë datë, ndonëse janë shprehur se do të votonin pro bashkimit, në rast se do të mbahej një referendum i tillë.
Vegëza e deklaratave të Kurtit e Ramës gjatë mbledhjes së fundit të përbashkët mes dy qeverive në Elbasan:
Analiza:
Pretendimi i zyrtarit serb, Milovan Drecun, se autoritetet kosovare kanë ndërtuar një strategji për të krijuar një Kosovë etnikisht të pastër, duke i larguar serbët dhe për bashkim me Shqipërinë, është tërësisht e pabazuar.
Për këtë arsye, hibrid.info e vlerëson këtë pretendim të Drecun si “Teori Konspirative”.
Arsyetimi:
Vlerësim si “Teori konspirative” marrin ato raportime mediatike të cilat shpërndajnë një përshkrim të rremë ose të paverifikueshëm të një dukurie, ngjarje ose një personi, duke e paraqitur atë si pjesë ose rezultat të një plani të fshehtë (“komplot”). Karakteristikë e këtyre raportimeve është se ato paraqesin një seri pretendimesh, të paraqitura si fakte, midis të cilave vendosen marrëdhënie shkak-pasojë, pa ofruar ndonjë provë të besueshme.
