Hibrid.info ka organizuar të martën konferencën me rastin e përmbylljes së projektit “Bashkëpunimi me Media në Kosovë”, projekt i mbështetur nga Ambasada e Francës në Kosovë, duke bërë bashkë përfaqësues të institucioneve, mediave, shoqërisë civile dhe gazetarë nga komunitete të ndryshme.
Konferencën e hapi Olivier Guérot, ambasador i Francës në Kosovë, i cili në fjalën e tij theksoi rëndësinë e mbështetjes së mediave të pavarura dhe bashkëpunimit ndërmjet gazetarëve përballë sfidave të përbashkëta. Ai nënvizoi ndikimin që dezinformimi ka në shoqëri dhe rëndësinë e iniciativave që forcojnë gazetarinë profesionale, dialogun ndërmjet komuniteteve dhe besimin në informacionin e verifikuar. Ambasadori, po ashtu, vlerësoi projektin “Bashkëpunimi me Media në Kosovë” si një shembull konkret të këtij angazhimi.
Në vijim, nga Hibrid.info është prezantuar rrugëtimi dhe rezultatet e projektit, i cili u fokusua në ndërtimin e partneritetit ndërmjet organizatave dhe mediave, trajnimet profesionale, kurset e gjuhës shqipe dhe serbe, gazetarinë hulumtuese, prodhimin e përmbajtjeve mediale dhe ndikimin që ato patën te publiku.
Konferenca vijoi me dy diskutime panelesh kushtuar sfidave dhe perspektivave të gazetarisë në Kosovë. Paneli i parë, “E ardhmja e mediave të pavarura në Kosovë”, trajtoi çështje që lidhen me dezinformimin, besimin e publikut, qëndrueshmërinë e mediave dhe pavarësinë editoriale. Ndërkaq, paneli i dytë, “Gazetaria si urë bashkëpunimi ndërmjet komuniteteve”, u përqendrua në rolin e gazetarisë bashkëpunuese në promovimin e dialogut, mirëkuptimit dhe bashkëpunimit ndërmjet komuniteteve.
Ky projekt u zbatua nga një partneritet prej tetë organizatash: Hibrid.info, Kosovo 2.0, KoSSev, Radio Kim, Radio Goraždevac, BIRN, Media Center Çaglavica dhe Instituti Francez në Kosovë, me mbështetjen e Ambasadës së Francës në Kosovë. Gjatë gjithë zbatimit të projektit partnerët bashkëpunuan ngushtë në zhvillimin e trajnimeve, kurseve të gjuhës, prodhimin e artikujve, videove, podcast-eve, debateve publike dhe aktiviteteve të tjera që synuan forcimin e bashkëpunimit ndërmjet mediave shqip dhe serbisht folëse.
Konferenca u përmbyll me mesazhin se, edhe pse projekti ka arritur në fundin e tij, partneritetet, rrjetet profesionale dhe bashkëpunimi i krijuar përbëjnë një bazë të rëndësishme për iniciativa të reja në të ardhmen.
