Më pak se pesë vjet pas anëtarësimit në Rrjetin Ndërkombëtar të Kontrolluesve të Fakteve (IFCN), Hibrid.info shënon një tjetër hap të madh e të rëndësishëm në angazhimin ndërkombëtar, duke u bërë pjesë e Bordit të IFCN.
Xhemajl Avdyli, Menaxher i Programit dhe Zhvillimit në ADS/Hibrid.info, është zgjedhur anëtar i Bordit të IFCN, pasi siguroi një nga dy vendet evropiane të hapura në këtë cikël zgjedhor. Mandati i tij është trevjeçar, me mundësi rizgjedhjeje edhe për një mandat të dytë.
Përzgjedhja e anëtarëve të rinj të Bordit të IFCN u zhvillua në dy faza. Në votimin evropian, Avdyli siguroi mbështetjen më të lartë, me 56.4 për qind të votave, duke u përzgjedhur për fazën përfundimtare. Në votimin global, ai siguroi shumicën e nevojshme të votave dhe u zgjodh anëtar i Bordit të IFCN.
Përmes këtij mandati, përvoja e Hibrid.info dhe perspektivat nga Kosova dhe Ballkani Perëndimor do të përfshihen më drejtpërdrejt në diskutimet dhe proceset vendimmarrëse mbi standardet profesionale, integritetin e informacionit dhe zhvillimin e mëtejshëm të komunitetit ndërkombëtar të kontrolluesve të fakteve.
Zgjedhja e përfaqësuesit të Hibrid.info në Bordin e IFCN është një vlerësim për punën tonë në fushën e integritetit të informacionit, standardeve profesionale dhe bashkëpunimit ndërkombëtar. Ky mandat është njëkohësisht përgjegjësi për të kontribuar në zhvillimin e mëtejshëm të IFCN dhe në forcimin e komunitetit global të kontrolluesve të fakteve.
Roli i Bordit të IFCN
Bordi është një nga strukturat kryesore të qeverisjes së IFCN dhe përbëhet nga përfaqësues të organizatave nga rajone të ndryshme të botës.
Ai luan rol të drejtpërdrejtë në orientimin strategjik të Rrjetit, duke shqyrtuar dhe ratifikuar strategjinë dhe nismat kryesore të IFCN. Bordi, gjithashtu këshillon drejtorin dhe stafin për programet, prioritetet dhe çështjet që ndikojnë në zhvillimin e mëtejshëm të Rrjetit dhe të komunitetit ndërkombëtar të kontrolluesve të fakteve.
Një nga përgjegjësitë e tij është edhe shqyrtimi dhe miratimi, ose refuzimi i rekomandimeve të vlerësuesve të jashtëm për organizatat që aplikojnë për t’u bërë nënshkruese të Kodit të Parimeve të IFCN, si dhe për rinovimin e statusit të organizatave ekzistuese. Përmes këtij procesi, Bordi kontribuon drejtpërdrejt në ruajtjen e standardeve profesionale, integritetit dhe besueshmërisë së Rrjetit.