Hibrid.info ka publikuar të dhënat më të fundit që tregojnë për një rritje të keqinformimit në rrjetet sociale, veçanërisht në TikTok, lidhur me zgjedhjet parlamentare në Kosovë të 9 shkurtit 2025.
Sipas raportit, gjatë muajit tetor shumica e përmbajtjeve keqinformuese janë shpërndarë në rrjete sociale, ku TikTok ka qenë platforma më e përdorur. Temat kryesore të këtyre përmbajtjeve përfshijnë sondazhet zgjedhore dhe procesin zgjedhor në vend.
Të dhënat tregojnë se që nga caktimi i datës së zgjedhjeve janë identifikuar dhe verifikuar gjithsej 14 sondazhe të rreme, shumica prej tyre të publikuara në TikTok.
Ekspertët theksojnë se formatet e thjeshta dhe të shpejta të videove në këtë platformë kontribuojnë në përhapjen më të lehtë të keqinformatave, duke ndikuar veçanërisht në diskursin politik dhe fushatat zgjedhore.
Hibrid.info njofton se do të vazhdojë angazhimin në luftimin e çrregullimit informativ, me synim krijimin e një mjedisi mediatik më të shëndetshëm dhe më të besueshëm në Kosovë.
