Portali informativ “Kosova-sot.info”, ka publikuar dje (9 nëntor) një artikull me titull “Të shtëna në një shkollë, raportohet për një të plagosur”.
Pas verifikimit të fakteve të paraqitura në përmbajtje, hibrid.info ka vërtetuar se titulli i artikullit është përgjithësues, pra nuk sqaron se në cilin shtet ka ndodhur kjo ngjarje.
Lajmi bëhet i qartë vetëm në përmbajtje, ku thuhet se “një nxënës i një shkolle në qytetin gjerman të Offenberg ka plagosur me armë zjarri një shok klase”.
Pasi që ky portal informativ është i regjistruar në Kosovë (shih këtu) dhe shumicën e lexuesve i ka shqipfolës (shih këtu), titulli në fjalë, mund t’i dezinformojë lexuesit duke i bërë ata që të kuptojnë se lajmi ka të bëjë me vendin tonë.
Vegëza e artikullit të publikuar në portalin “Kosova-sot.info”:
Për ta vërtetuar edhe më shumë faktin se lajmi ka të bëjë me ngjarjen që ka ndodhur në një qytet në Gjermani, hibrid.info ka gjetur artikullin e publikuar në mediat gjermane. (këtu)
Analiza:
Portali informativ “Kosova-sot.info” ka publikuar një artikull lidhur me një plagosje në një shkollë, por në titull nuk sqarohet se në cilin shtet ka ndodhur ngjarja.
Ky medium online është portal i cili vepron në Kosovë dhe bazuar në përcjellësit e faqes në Facebook, numrin më të madh të lexuesve i ka nga Kosova. Pra, mosdhënia e informacioneve për vendin e ngjarjes, shumë lehtë mund t’i dezinformojë lexuesit, duke i bërë të mendojnë se ngjarja ka ndodhur në Kosovë.
Bazuar në metodologjinë e punës, hibrid.info e vlerëson këtë artikull si “Clickbait”.
Vlerësimi:
Vlerësimin “Clickbait” e marrin ato tekste titujt e të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
