Disa faqe në Facebook kanë publikuar përmbajtje me pretendimin se kryeministri në detyrë i Kosovës, Albin Kurti, do të udhëtojë javën e ardhshme në Shtetet e Bashkuara të Amerikës (SHBA), ku do të marrë pjesë në Asamblenë e Përgjithshme të Kombeve të Bashkuara.
Hibrid.info ka gjetur këtë përmbajtje të publikuar më 2 shtator në Facebook nga faqet “Publiku”, “Momenti”, “Korrekt Press” e “Kosovalb.com”.
Çka dihet deri tash?
Ky pretendim nuk është konfirmuar nga Qeveria e Kosovës.
Agjencia e Lajmeve “KosovaPress.com” ka kontaktuar Qeverinë e Kosovës për të verifikuar nëse kryeministri në detyrë, Albin Kurti, do të udhëtojë në SHBA për të përfaqësuar Kosovën në Asamblenë e Përgjithshme të OKB-së.
Bazuar në artikullin e publikuar në KosovaPress, nga Qeveria e Kosovës nuk kanë treguar nëse Kurti do të udhëtojë për këtë qëllim.
Asambleja e Përgjithshme e OKB-së do të hapë punimet e sesionit të 81-të më 8 shtator, ndërsa pjesëmarrja e Kurtit në këtë ngjarje nuk është konfirmuar nga Qeveria e Kosovës.
Kurti kishte udhëtuar në SHBA edhe vitin e kaluar në të njëjtën cilësi, ku, në kuadër të Javës së Nivelit të Lartë të Asamblesë së Përgjithshme të Kombeve të Bashkuara, kishte zhvilluar një sërë takimesh bilaterale (shih këtu dhe këtu).
Analiza
Disa faqe në Facebook kanë pretenduar se kryeministri në detyrë, Albin Kurti, do të udhëtojë javën e ardhshme në SHBA për të marrë pjesë në Asamblenë e Përgjithshme të OKB-së. Megjithatë, ky pretendim nuk është konfirmuar zyrtarisht.
KosovaPress ka kontaktuar Qeverinë e Kosovës për të verifikuar nëse Kurti do të udhëtojë në SHBA, por nga Qeveria nuk kanë treguar nëse ai do ta përfaqësojë Kosovën në këtë ngjarje
Bazuar në metodologjinë e punës, hibrid.info e vlerëson përmbajtjen e publikuar nga faqet në Facebook si të “pa verifikuar”.
Arsyetimi
Vlerësimi “I pa verifikuar” u bëhet atyre përmbajtjeve informative që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur të verifikohen për shkak të rrethanave të caktuara (shpejtësisë, mungesës së burimeve) gjatë publikimit të përmbajtjes.