Shkroi: Etrit Rexhepi
Janë publikuar disa artikuj në të cilat pretendohet se Korporata Energjetike e Kosovës (KEK) ka njoftuar për ndaljen e njësinë A4 të Termocentralit Kosova A në mesnatë.
Tekstet me këtë pretendim janë publikuar dje (17 qershor) nga mediat si: “Ekonomia Online”, “AlbanianPost”, “Insajderi.org”, “DtvMedia”, “GazetaDemos” etj.
Por, çka nuk shkon me pretendimin?
Hibrid.info ka gjetur se njoftimi i publikuar dje nga KEK-u, daton nga 10 maji i këtij viti. Ndërsa mediat në fjalë e kanë publikuar si ngjarje të ndodhur dje.
Hibrid.info ka kontrolluar në faqen në Facebook të KEK-ut, aty ku kjo ndërmarrje publikon njoftimet (shih këtu). Gjatë monitorimit është vërejtur se vetëm gjatë ditës së djeshme, kjo faqe ka publikuar mbi 50 postime.
Në mesin e postimeve të djeshme është hasur edhe njoftimi për ndaljen e njësisë A4 të Termocentralit Kosova A (TCA). Njoftimit i është vendosur data 10.05.2025 (shih këtu).
Në postimin e fundit për ditën e djeshme, KEK-u ka shpjeguar arsyet pse janë publikuar një numër i madh postimesh (shih këtu).
Sipas këtij njoftimi tregohet se faqja zyrtare e KEK-ut në Facebook ishte pezulluar përkohësisht për shkak të tentativave për ta hakuar, por e njëjta është rikthyer dhe është e sigurt. Njoftimi ka bërë të ditur gjithashtu se postimet nga janari 2025 janë përditësuar dhe secila prej tyre është e shënuar me datën përkatëse, për të garantuar transparencë.
Për të verifikuar se nuk bëhet fjalë për ndaljen e njësisë A4 të Termocentralit Kosova A, Hibrid.info ka kërkuar përmes motorit të kërkimit “Google” informacion të lidhur me KEK-un për datën 10 maj (shih këtu).
Rezultatet e kërkimit kanë shfaqur një artikull të publikuar më 10 maj nga mediumi “Indeksonline”, në të cilin raportohej për ngjarjen e pretenduar (shih këtu).
Analiza:
Pretendimi për ndaljen e njësisë A4 të Termocentralit Kosova A më 17 qershor nuk qëndron.
Njoftimi për ndaljen e njësisë A4 daton nga 10 maji, por është rishfaqur më 17 qershor për shkak të përditësimit të faqes së KEK-ut.
Andaj, bazuar në metodologjinë e punës, hibrid.info i vlerëson këto përmbajtje si “Gabim”.
Arsyetimi:
Vlerësimin “Gabim” e marrin përmbajtjet informative në të cilat, gjatë procesit të përpilimit apo publikimit, paraqiten gabime duke publikuar informacion të pasaktë (sidomos kur kemi të bëjmë me informacione në shifra) ose duke transmetuar lajme të pavërtetuara mirë, pa qëllimin e qartë të dezinformimit të publikut.
