Shkroi: Etrit Rexhepi
Artikulli i vlerësuar si “Gabim”, i publikuar nga disa mediume, u korrigjua përmes largimit të tij nga platformat.
Janë publikuar disa artikuj që pretendojnë se gjatë seancës së 45-të për konstituimin e Kuvendit të Kosovës, deputetja nga Lëvizja Vetëvendosje (VV), Saranda Bogujevci ka përdorur gjuhë fyese ndaj deputetes nga Aleanca për Ardhmërinë e Kosovës (AAK), Time Kadrijaj.
Përmbajtjet me këtë pretendim janë publikuar sot (11 korrik) nga mediumet online si: “GazetaExpress.com”, “Insajderi” dhe “Lajmi.net”.
Çka nuk shkon me këto përmbajtje?
Mediumet e lartpërmendura kanë publikuar artikujt, ku thuhej se “Bogujevci është dëgjuar duke i thënë Kadrijajt ”merre terapinë”. Deputetja e VV-së i ka thënë se Kadrijajt duhet edhe ”marre me të ardhë’”.
Hibrid.info ka gjetur se në këtë tekst, fraza “merre terapinë” i është atribuuar gabimisht deputetes Bogujevci, ndërsa në të vërtetë ajo është thënë nga deputetja Kadrijaj.
Madje, pas pak kohësh, hibrid.info ka vërejtur se të tri këto mediume i kanë fshirë artikujt e lartpërmendur.
Pretendimi i njëjtë është publikuar edhe nga disa faqe në Facebook si: “Faktet.com”, “VushtrriaOnline” dhe “Shekulli.info”.
Por, hibrid.info ka gjetur disa artikuj të publikuar në disa media, ku është deklaruar deputetja e AAK-së. Kadrijaj ka sqaruar se ndaj kujt është drejtuar fraza “merre terapinë”, duke mos e mohuar se ato fjalë kanë ardhur nga ajo (shih këtu dhe këtu).
Analiza:
Pretendimi se deputetja Saranda Bogujevci i ka thënë frazën “merre terapinë” deputetes Time Kadrijaj është i pasaktë.
Verifikimi i bërë nga Hibrid.info ka treguar se ajo fjali është thënë nga deputetja Kadrijaj.
Bazuar në metodologjinë e punës, hibrid.info e vlerëson përmbajtjen si “Gabim”.
Arsyetimi:
Vlerësimin “Gabim” e marrin përmbajtjet informative në të cilat, gjatë procesit të përpilimit apo publikimit, paraqiten gabime duke publikuar informacion të pasaktë (sidomos kur kemi të bëjmë me informacione në shifra) ose duke transmetuar lajme të pavërtetuara mirë, pa qëllimin e qartë të dezinformimit të publikut.