Përmes një përmbajtjeje të publikuar në Facebook pretendohet se ish-presidenti i Kosovës, Hashim Thaçi, pritet të lirohet nga paraburgimi në Hagë më 16 shtator dhe se, më 19 dhe 20 shtator, do të vizitojë Shtetet e Bashkuara të Amerikës (SHBA), me ftesë të Presidentit amerikan, Donald Trump.
Përmbajtja u publikua më 31 gusht 2026 nga faqja “Universal” në Facebook.
Çka nuk shkon me këtë përmbajtje?
Nuk ka fakte apo burime të besueshme që e mbështesin pretendimin se Thaçi pritet të vizitojë SHBA-të më 19 dhe 20 shtator, me ftesë të Presidentit amerikan, Donald Trump.
Kërkimi në Google nuk ka nxjerrë rezultate nga media kredibile apo burime të besueshme që raportojnë për një vizitë të tillë të Thaçit në SHBA me ftesë të Presidentit Trump (shih këtu).
Po ashtu, nuk është gjetur ndonjë njoftim për këtë vizitë në kanalet zyrtare të administratës amerikane, përfshirë seksionin “White House – Briefings & Statements”, ku publikohen deklaratat dhe njoftimet zyrtare të administratës amerikane.
Kërkimi online tregon se kjo përmbajtje është publikuar vetëm nga faqja “Universal” në Facebook, pa u mbështetur nga ndonjë burim tjetër kredibil.
Deri në shkrimin e këtij artikulli, përmbajtja e publikuar nga “Universal” ka grumbulluar 313 reagime, 39 komente dhe 92 shpërndarje (shih fotografinë më poshtë).
Ndërkaq, Dhomat e Specializuara të Kosovës kanë njoftuar se më 16 shtator 2026 do të shpallet aktgjykimi në çështjen gjyqësore ndaj Hashim Thaçit dhe tre ish-krerëve të tjerë të UÇK-së (shih këtu).
Transparenca e faqes “Universal” në Facebook
Faqja “Universal” në platformën Facebook ka mbi 64 mijë ndjekës. Sipas të dhënave të transparencës, faqja është krijuar më 3 mars 2019, menaxhohet nga Kosova dhe ka 9 administratorë (shih këtu).
Analiza
Përmes një përmbajtjeje të publikuar në Facebook pretendohet se Thaçi pritet të lirohet nga paraburgimi në Hagë më 16 shtator dhe se më 19 dhe 20 shtator do të vizitojë SHBA-në me ftesë të presidentit amerikan Donald Trump.
Megjithatë, nuk janë gjetur fakte apo burime kredibile që e mbështesin pretendimin për vizitën e Thaçit në SHBA. Kërkimi në media dhe në kanalet zyrtare të administratës amerikane, përfshirë faqen e Shtëpisë së Bardhë, nuk shfaq ndonjë njoftim për një ftesë apo vizitë të tillë.
Bazuar në metodologjinë e punës, hibrid.info e vlerëson këtë përmbajtje si “Lajm i rremë”.
Arsyetimi
Vlerësimin “Lajm i rremë” e marrin ato përmbajtje informative që janë tërësish të sajuara apo të cilat në vete përmbajnë pretendime ose informacione faktikisht të gabuara. Përmbajtja që vlerësohet si lajm i rremë mund të përcaktohet se është krijuar dhe shpërndarë me qëllim të dezinformimit të publikut, d.m.th., për të paraqitur një pretendim që është plotësisht i rremë si fakt.