Shkroi: Fatbardh Dema
Përmes një postimi të publikuar me mbishkrimin “Kush është kandidati më i mirë për Kryeministër”, paraqiten disa shifra në përqindje si dhe figurat e katër kandidatëve për kryeministër të Kosovës.
Albin Kurti – LVV 86%, Bedri Hamza – PDK 7%, Lumir Abdixhiku – LDK 6% dhe Ramush Haradinaj – AAK 1%.
Fotografia mban logon e televizionit ATV, ndërsa u publikua me datë 13 nëntor në TikTok nga llogaria “folejadardanis”.
Çka nuk shkon me këtë postim?
Pas hulumtimit të kryer nga hibrid.info, u vërtetua se imazhi është publikuar nga televizioni ATV në faqen zyrtare në Facebook, por në të nuk figurojnë përqindjet e lartcekura. (këtu)
Postimi në faqen zyrtare në Facebook nga ATV u publikua me datë 8 nëntor.
Pra, llogaria në TikTok ka marrë këtë imazh nga ATV dhe më pas i ka vënë përqindjet tek secili kandidat, duke e paraqitur si sondazh.
Analiza:
U publikua një imazh me figurat e katër kandidatëve për kryeministër të Kosovës, e që secilit prej tyre i është vënë një shifër në përqindje. Ky imazh mban mbishkrimin “Kush është kandidati më i mirë për Kryeministër”.
Pas verifikimit të fakteve nga hibrid.info, u vërtetua se në këtë imazh është ndërhyrë. Postimi fillimisht është bërë nga televizioni ATV në faqen zyrtare në Facebook, në të cilën vërehet se nuk figurojnë përqindjet.
Bazuar në metodologjinë e punës, hibrid.info e vlerëson këtë postim të bërë në TikTok si “Mashtrim”.
Arsyetimi:
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.