Artikulli me titull “Vendi drejt mbylljes për shkak të variantit Omicron”, është publikuar nga portali “kosova-sot.info”, dhe në fotografinë ilustruese ka vendosur një imazh ku shihet një pjesë e rrugës Agim Ramadani në Prishtinë.
Me këtë fotografi të vendosur, portali “kosova-sot.info” ka lënë të kuptohet se lajmi për mbyllje të vendit për shkak të variantit Omicron, ndërlidhet me Kosovën, pasi edhe në titull nuk bëhet e qartë se për cilin shtet bëhet fjalë.
Por në fakt, lajmi paraqet vendimin e autoriteteve të Britanisë së Madhe për kufizim të masave.
Në përmbajtje të këtij arti thuhet se “Britania është në një nivel të ri infektimesh, për shkak të variantit Omicron, në qarqet politike dhe shkencore po shtohet presioni ndaj qeverisë për një lockdown të ri për dy javë për të ulur numrin e infektimeve”.
Duke ditur se portali “kosova-sot.info”, është i regjistruar në Kosovë dhe shumicën dërmuese të lexuesve i ka shqipfolës, artikulli me titull përgjithësues e jo sqarues, mund t’i dezinformojë lexuesit, duke lënë të kuptohet se masat e reja anti-Covid kanë të bëjnë me Kosovën.
Vegëza e artikullit të publikuar në “kosova-sot.info”:
https://www.kosova-sot.info/lajme/589496/vendi-drejt-mbylljes-per-shkak-te-variantit-omicron/
Hibrid.info ka arritur të gjejë këtë fotografi të publikuar më parë si ilustrim për ngjarje tjera që ndërlidhen me aktualtietet kosovare. “radiokosovaelire.com”, ka përdorur për lajmin për mbylljen e rrugës “Agim Ramadani për shkak të punimeve (19 nëntor 2020) (këtu), si dhe portali tjetër “epokaere.com”, për bllokimin e kësaj rruge (27 shtator 2021) për shkak të vizitës zyrtare të kryeministrit të Shqipërisë, Edi Rama (këtu).
Analiza:
Portali “kosova-sot.info” ka publikuar artikullin që ka të bëjë me Britaninë e Madhe, e cila është duke shqyrtuar mundësinë për mbyllje të vendit, si pasojë e rritjes së të infektuarve me variantin e ri “Omicron”.
Por, në publikimin e këtij artikulli është vendosur fotografi tjetër, ajo e rrugës “Agim Ramadani” në Prishtinë. Kjo mund të dezinformojë lexuesit, duke lënë të kuptohet se ky vendim ka të bëjë me Kosovën.
Nga analiza e kontrollit të fakteve e kryer nga hibrid.info, ky artikull merr vlerësimin si “clickbait”.
Arsyetimi:
Vlerësimin “Clickbait” e marrin ato tekste titulli i të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
