Portali i dyshimtë me përmbajtje në gjuhën shqipe “bera.todaynews44.com” ka publikuar një artikull me titull “URIME Ligji hyri ne fuqi, pensionimi i me hershem tani me prej moshes…”.
Pas kontrollit të fakteve, hibrid.info ka vërtetuar se ky artikull përmban titull të rremë, i cili nuk përputhet me përmbajtjen.
Në përmbajtje gjendet një raport i muajit shkurt të vitit 2021 i publikuar nga Instituti GAP në Kosovë, i cili kishte rekomanduar politika për pensionim të parakohshëm të shërbyesve civilë.
Pra, nuk ka hyrë në fuqi një ligj i tillë në Kosovë, siç pretendohet rrejshëm në titullin e këtij artikullit.
Vegëza e artikullit të publikuar në portalin e dyshimtë “bera.todaynews44.com”:
Ky artikull me titull të sajuar është shpërndarë edhe në Facebook nga faqja “33shi.com”, e cila numëron mbi 40 mijë ndjekës. (shih këtu)
Nga hulumtimi i kryer përmes makinave të kërkimit, Hibrid.info ka arritur të gjejë raportin e muajit shkurt të vitit 2021 të publikuar nga Instituti GAP në Kosovë, lidhur me rekomandimin e politikave ku inkurajojnë pensionimin e parakohshëm. (shih këtu)
Kjo nuk është hera e parë që ky artikull publikohet nga portale të dyshimta, pasi i njëjti është shpërndarë edhe në muajin shkurt të këtij viti nga një portal tjetër i dyshimtë, e që gjithashtu është verifikuar nga hibrid.info. (shih këtu)
Analiza:
Portali i dyshimtë “bera.todaynews44.com” ka publikuar një raport të vjetër të Institutit GAP, i cili kishte rekomanduar politika për pensionim të parakohshëm të shërbyesve civilë.
Këtij artikulli i është vënë qëllimshëm titull i rremë, me pretendimin se ka hyrë në fuqi ligji që mundëson pensionimin e më hershëm.
Nga analiza e kontrollit të fakteve bazuar në metodologjinë e punës, Hibrid.info e ka vlerësuar këtë artikull si “Dezinformatë”.
Arsyetimi:
Vlerësimin si “Dezinformatë” e merr ai raportim mediatik i cili në vete përmban një “miks” të burimeve të pasakta apo edhe përmbajtje gjysmë të vërtetë. Gjithashtu, ky vlerësim do të trajtojë raporte që kanë atribute të gabuara ose tituj që nuk pasqyrojnë tekstin për sa i përket saktësisë së informacionit.