Një artikull me titull “20-vjeçarja përdhunohet në grup nga 6 djem në dhomën e hotelit” është publikuar dje (7 korrik) nga mediumi online “BotaSot.info”.
Pas hulumtimit dhe verifikimit nga hibrid.info është vërtetuar se titulli nuk e qartëson vendndodhjen e ngjarjes.
Hibrid.info ka gjetur se lajmi qartësohet vetëm në përmbajtjen e tekstit kur thuhet se “Një turiste 20-vjeçare raportohet se është përdhunuar në grup brenda një dhome hoteli në ishullin spanjoll të Majorkas, pasi u josh nga një grup të rinjsh”.
Vegëza e artikullit të publikuar në “Bota Sot”:
Duke parë se mediumi në fjalë është në gjuhën shqipe, i regjistruar në Kosovë (shih këtu), si dhe në bazë së të dhënave në faqen e mediumit në Facebook (këtu), ku shihet se ndjekësit e faqes janë kryesisht shqipfolës, hibrid.info ka vërtetuar se çdo pa qartësi e vendndodhjes së ngjarjes, lë të nënkuptojë se ngjarja ka ndodhur në një nga hapësirat shqipfolëse.
Për ta vërtetuar edhe më shumë se ngjarja ka ndodhur në Mallorca të Spanjës, hibrid.info e ka gjetur lajmin e raportuar edhe në disa media të huaja (shih këtu dhe këtu).
Analiza:
Pas verifikimit e fakteve, hibrid.info ka vërtetuar se gazeta online “Bota Sot” ka publikuar një artikull lidhur me dhunimin e një 20 vjeçareje nga 6 djem në një dhomë hoteli, por pa e qartësuar vendin se ku ka ndodhur ngjarja.
Bazuar në metodologjinë e punës, hibrid.info e vlerëson këtë artikull si “Clickbait”.
Arsyetimi:
Vlerësimin “Clickbait” e marrin ato tekste titujt e të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.