Postimet që përhapen teori të pa verifikuara në lidhje me pandeminë vazhdojnë të përhapen në platformat e mediave sociale.
BBC ka ekzaminuar valën e fundit të informacionit të rremë në tituj që kanë të bëjnë me pajisjet e testimit Covid dhe vaksinat.
Tamponët e testit nuk përmbajnë kimikate që shkaktojnë kancer
Tamponët e testeve për korona virusin janë duke u përhapur në vendet e punës dhe në shkolla, por postimet virale në Facebook po pretendojnë gabimisht se ato janë të rrezikshme dhe shkaktojnë kancerin.
Videot dhe fotot pretendojnë se ato përmbajnë oksid etileni, një kancerogjen i njohur. Mirëpo, ambalazhet e testeve, sipas Qendrës së Shëndetit Publik në Britani të Madhe (NHS) janë “të sterilizuara me oksid etileni”.
Edhe Departamenti i Shëndetit dhe Kujdesit Social në qeverinë britanike, kanë bërë të ditur se, ndërsa kimikati përdoret në formë të gaztë për të sterilizuar shtupat e testit, sasitë e përdorura janë brenda kufijve të sigurisë dhe janë “testuar në mënyrë rigoroze dhe janë të sigurta për t’u përdorur rregullisht”.
Edhe autoritetet e SHBA-së e demantojnë një pretendim të tillë. Rreth gjysma e të gjitha pajisjeve mjekësore amerikane janë sterilizuar me oksid etileni, i cili është një metodë efektive që nuk dëmton pajisjet. Fazat e mëtejshme në procesin e sterilizimit heqin gazin pothuajse tërësisht.
Keqkuptimi i aborteve spontane
Një postim në blog që pretendon se normat e abortit “si rezultat” i marrjes së një vaksine Covid-19 janë rritur me 366% është shpërndarë gjerësisht në mediat sociale.
Nuk ka asnjë provë që vaksinat Covid-19 mund të rrisin rrezikun e abortit.
Sipas institucioneve britanike si NHS, numri i aborteve spotante është rritur në përgjithësi. Mirëpo, rekomandimet e bëra nga hulumtuesit sugjerojnë që vaksinat të mos merren nga gratë shtatzëna, duke qenë se ende nuk kanë përfunduar studimet rreth efekteve anësore që shkaktohen nga vaksinat. Mirëpo, kjo nuk do të thotë se marrja e vaksinave shkakton abort spontan.
Pretendimet mutante bëhen virale
Një shkak i fundit i marrë nga aktivistët e anti-vaksinimit ka të bëjë me përhapjen e varianteve të reja të koronavirusit.
Shumë iu referuan deklaratave të botuara nga Geert Vanden Bossche, një veteriner belg dhe studiues i vaksinave.
Ai thotë se mbështet vaksinat, por në një seri letrash paralajmëron për rreziqet e vaksinimeve Covid-19, të cilat ai thotë se rrezikojnë krijimin e varianteve të reja të koronavirusit që mund të “rezultojë në një katastrofë globale të pabarabartë”.
Organizata Botërore e Shëndetësisë (OBSH) thotë se, me rritjen e numrit e të vaksinuarve, pret që “qarkullimi i virusit të ulet, i cili më pas do të çojë në më pak mutacione”.
(Artikullin e plotë në anglisht mund ta lexoni në BBC)
