Sot (6 qershor) është publikuar një artikull nga mediumi online “kosova-sot.info”, me titull “Lajm i mirë për policët e Kosovës, vendimi për pagesën e shtesave”.
Përmbajtja e artikullit ka të bëjë me deklarata nga Gazmend Hoxha, drejtor i Policisë së Kosovës, i cili sot raportoi para anëtarëve të Komisionit për çështje të sigurisë, në Kuvendin e Kosovës.
Por, pas verifikimit të fakteve, hibrid.info ka gjetur se titulli i artikullit nuk korrespondon me përmbajtjen.
Vegëza e artikullit të publikuar në “kosova-sot.info”:
Pjesë nga deklaratat e Gazmend Hoxhës:
Drejtori i Përgjithshëm i Policisë së Kosovës, Gazmend Hoxha, ka thënë se policëve nuk iu është paguar asnjë cent në tre muajt e fundit për rrezikshmërinë në punë. Hoxha, ka raportuar në Komisionin për Siguri, ku ka thënë mes tjerash se Policia e Kosovës akoma s’ka as sigurim shëndetësor, transmeton “Kosova Sot Online”.
“Rrezikshmëria nuk është paguar në tre muajt e fundit, jemi në bisedime me Ministrinë e Brendshme këtë muaj presim që të paguhemi”, tha Hoxha.
Përderisa titulli i artikullit pretendon se është marrë vendim mbi pagesën e shtesave për rrezikshmërinë në punë për policët, në përmbajtjen e artikullit kuptohet se drejtori i Policisë, Gazmend Hoxha ka deklaruar se në tre muajt e fundit nuk është paguar rrezikshmëria në punë dhe se pret që muajin e ardhshëm të kryhen pagesat shtesë për policët, pa përmendur marrjen e një vendimi mbi kryerjen e këtyre pagesave.
Më 22 dhjetor të vitit 2022 është miratuar ligji për pagat në sektorin publik (shih këtu) ndërsa më 5 janar, 2023 është publikuar në gazetën zyrtare (shih këtu). Hibrid.info me anë të makinave të kërkimit ka gjetur se ligji në fjalë e rregullon çështjen e pagesës shtesë për rrezikshmërinë në punë, çka nënkupton se për kryerjen e pagesave shtesë nuk nevojitet vendim nga ministria përkatëse.
Për të vërtetuar edhe më shumë se titulli nuk korrespondon me deklaratat e Hoxhës, hibrid.info ka gjetur artikuj të publikuar mbi raportimin e drejtorit të Policisë edhe në media të tjera të (shih këtu dhe këtu).
Analiza:
Është publikuar një artikull me titull që pretendon se është marrë vendim për pagesën e shtesave për rrezikshmërinë në punë, për policët.
Pas hulumtimit, hibrid.info ka vërtetuar se kemi të bëjmë me një deklaratë, të drejtorit të Policisë, Gazmend Hoxha, i cili ka thënë se janë bërë tre muaj që policët nuk kanë marrë pagesat shtesë dhe se pret që muajin tjetër të bëhet pagesa. Në raportimin e Hoxhës para Komisionit për çështje të sigurisë, në Kuvend, nuk përmendet marrja e ndonjë vendimi mbi këtë çështje.
Bazuar në metodologjinë e punës, hibrid.info e vlerëson këtë artikull si “clickbait”.
Arsyetimi:
Vlerësimin “Clickbait” e marrin ato tekste titujt e të cilave nuk kanë asnjë bazë në përmbajtjen e tekstit vijues. Tekste dhe artikuj të tillë synojnë të tërheqin vëmendjen e lexuesit apo edhe konsumatorit me një titull sensacional duke premtuar përmbajtje që nuk ekziston në të vërtetë dhe janë krijuar kryesisht nga interesi financiar, domethënë për shkak të rritjes së lexueshmërisë. Pra, ky lloj teksti ka për qëllim vetëm klikimin, i cili mund të shndërrohet në përfitim të prodhuesit të përmbajtjes.
