Shkroi: Fatbardh Dema
U publikua një video-material që shfaq ish-aktorin Arnold Schwarzenegger, me pretendimin se ai ka lavdëruar kombëtaren shqiptare të futbollit.
Ky video-material u publikua me datë 25 qershor në median sociale TikTok nga llogaria “DardaniaTimes”.
Çfarë nuk shkon me këtë video?
Pas verifikimit të kryer nga hibrid.info, është vërtetuar se ky video-material është gjeneruar me inteligjencë artificiale. Pra, një deklaratë e tillë nuk është bërë nga Schwarzenegger.
Vegëza e video-materialit të publikuar në TikTok nga llogaria “DardaniaTimes”:
Pasi të shikohet video-materiali, vërehet një panatyrshmëri tek goja e ish-aktorit.
Për të mbështetur këtë fakt, hibrid.info ka analizuar video-materialin përmes platformës “TrueMedia.org”, që identifikon përmbajtjet deepfake apo të gjeneruara me inteligjencë artificiale.
Në bazë të rezultateve të dhëna nga kjo platformë, del që video-materiali është përmbajtje e gjeneruar me AI. (shih këtu)
Pas verifikimit përmes programit të automatizuar “InVID”, hibrid.info ka arritur të gjejë materialin e njëjtë ku flet ish-aktori Schwarzenegger. Videoja është gjetur e publikuar në Youtube nga kanali GQ me datë 29 tetor 2019. (shih këtu)
Në këtë intervistë, Schwarzenegger ka folur rreth personazheve filmike që ai kishte interpretuar.
Analiza:
Nëpërmjet një video-materiali, u pretendua se ish-aktori Arnold Schëarzenegger ka lavdëruar kombëtaren shqiptare të futbollit.
Pas verifikimit të fakteve nga hibrid.info, është gjetur se video-materiali është i gjeneruar me inteligjencë artificiale. Përmbajtja është marr nga një intervistë e vjetër e Schwarzenegger, ku ai kishte folur rreth personazheve filmike që kishte interpretuar.
Bazuar në metodologjinë e punës, hibrid.info e vlerëson përmbajtjen si “Mashtrim”.
Arsyetimi:
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.