Shkroi: Fatbardh Dema
Përmes një videoje të publikuar dje (12 qershor), pretendohet se “Digjet komplet Qendra Tregtare në Breg të Diellit”.
Kjo video u publikua në faqet e portalit “GazetaInfokus.com” në Facebook dhe Instagram.
Çka nuk shkon me këtë pretendim?
Pas hulumtimit të kryer online, u konstatua se pretendimi se Qendra Tregtare është djegur plotësisht nuk është i saktë.
Dje rreth orës 17:00, u raportua për një zjarr në një pjesë të Qendrës Tregtare në lagjen Bregu i Diellit, e sipas njoftimit të Komunës së Prishtinës, thuhet se “falë reagimit të menjëhershëm dhe profesional të Brigadës së Zjarrfikësve të Kryeqytetit, zjarri u lokalizua dhe u vu nën kontroll plotësisht deri në ora 17:15 – vetëm pak minuta pas alarmit”. (këtu)
Hibrid.info ka gjetur edhe artikullin e publikuar në portalin informativ “Koha.net”, lidhur me këtë ngjarje, ku sqarohet se zjarri ka përfshirë vetëm një pjesë të kulmit të Qendrës Tregtare në Bregun e Diellit.
Malë Gashi nga zjarrfikësit në rajonin e Prishtinës i ka thënë këtij mediumi se nga zjarri është përfshirë një pjesë e kulmit, që është e mbuluar me material pleksiglas, duke shtuar se falë reagimit të shpejtë, zjarri është shuar dhe s’është lejuar të shpërndahet në pjesë të tjera. (këtu)
Analiza:
Më 12 qershor u publikua një video nga portali “GazetaInfokus.com” në faqet zyrtare në Facebook dhe Instagram, me pretendimin se “është djegur komplet Qendra Tregtare në Breg të Diellit”. Ky pretendim rezulton të jetë i pavërtetë.
Pas hulumtimit të kryer online dhe verifikimit të burimeve zyrtare, u konstatua se zjarri ka përfshirë vetëm një pjesë të kulmit të objektit, e mbuluar me material pleksiglas, e që më pas zjarri është lokalizuar shpejt dhe është vënë nën kontroll brenda pak minutash, pa u shpërndarë në pjesë të tjera të objektit.
Bazuar në metodologjinë e punës, hibrid.info e vlerëson këtë pretendim si “Përmbajtje e pa verifikuar”.
Arsyetimi:
Vlerësimi “I pa verifikuar” u bëhet atyre përmbajtjeve informative që nuk ofrojnë informata të mjaftueshme për të konfirmuar pretendimet e bëra në raport, dhe të cilat nuk kanë mundur të verifikohen për shkak të rrethanave të caktuara (shpejtësisë, mungesës së burimeve) gjatë publikimit të përmbajtjes.