Publikohet një video-material ku paraqitet një qytetare duke shprehur qëndrimin e saj për zgjedhjet e 7 qershorit në Kosovë.
Në videon e publikuar të enjten (4 qershor) në TikTok nga llogaria me emrin “viralshqip4”, shihet një qytetare duke dhënë një prononcim për një medium në një ambient që ngjan me aeroport. Nga përmbajtja e videos nënkuptohet se bëhet fjalë për një person që ka udhëtuar nga jashtë vendit drejt Kosovës për të marrë pjesë në zgjedhjet parlamentare të së dielës.
Ajo në përmbajtje dëgjohet duke shprehur mbështetje gjithashtu për Albin Kurtin, kandidatin e Lëvizjes Vetëvendosje (LVV) për kryeministër.
Çka nuk shkon me përmbajtjen?
Videoja në fjalë nuk është autentike pasi ajo është e gjeneruara me inteligjencë artificiale (IA).
Deri në shkrimin e këtij artikulli, videoja në fjalë ka marrë mbi 73 mijë shikime, mbi 1 mijë e 600 pëlqime, 129 komente dhe mbi 600 shpërndarje.
Pas dyshimeve mbi autienticitetin e përmbajtjes, për verifikimin e përmbajtjes, hibrid.info ka përdorur platformën për identifikimin e përmbajtjeve të gjeneruara me IA, “Hive Moderation”.
Analiza e kryer nga kjo platformë ka treguar se kjo ka probabilitet të lartë të jetë krijuar nga kjo teknologji.
Përmbajtje të ngjashme të krijuara me IA janë publikuar dhe trajtuar nga hibrid.info (shih këtu dhe këtu).
Analiza
Një video-material paraqet një qytetare duke folur për zgjedhjet e 7 qershorit.
Pas verifikimit përmes platformës “Hive Moderation”, hibrid.info gjeti se përmbajtja nuk është reale, por e gjeneruar përmes inteligjencës artificiale.
Bazuar në metodologjinë e punës, hibrid.info i vlerëson këto përmbajtje si “Mashtrim”.
Arsyetimi
Vlerësimi “Mashtrim” u bëhet atyre përmbajtjeve informative të cilat manipulohen si në aspektin vizual (deepfake, cheapfake), zanor (audio) apo tekstual të përmbajtjes për të mashtruar audiencën. Zakonisht kjo formë e mashtrimit përdoret për të prodhuar përmbajtje të paqena dhe të manipuluara.